Tarihi sheshimde Alashorda ideiasy jeńdi. Bul týraly «Qazaq Respýblikasynyń 100 jyldyǵy jáne onyń qurylýyna «Alash» qairatkerleriniń úlesi» taqyrybynda ótken onlain konferentsiiada reseilik tarihshy Viktor Kozodoi aitty, dep habarlaidy QazAqparat.
«Saiasi tájiribe turǵysynan, 1917 jyldan bastap eki qatar joba júzege asyryldy. Bul Alash jobasy jáne Keńes jobasy. Alash jobasynyń ideialyq tamyry týraly uzaq ýaqyt sóileýge bolady. 1917 jyly jeltoqsanda Ekinshi jalpyqazaqtyq sezde Alash avtonomiiasyn qurý týraly sheshim qabyldanyp, basqarý organy - Alash Orda quryldy. Sonymen, joǵaryda atap ótken eki joba qatar ómir súre bastady. 1918 jyldyń basynan bastap bolshevikter shabýyly kúsheie tústi, sondyqtan Alash kósemderi jasyrynýǵa májbúr boldy. 1917 jyly jeltoqsanda josparlanǵan ideialar tolyq júzege asyryla almady», - deidi Viktor Kozodoi.
Onyń aitýynsha, Keńes úkimeti Alash Ordany sýbekt retinde moiyndamady. Azamat soǵysy aiaqtalǵannan keiin Keńes úkimetine qarsy shyqqandardyń bárine raqymshylyq jasaldy.
«Dál sol saiasi jaǵdaida Alash ziialylary durys sheshim qabyldady. Olar bastaǵan isin jalǵastyrý maqsatynda Keńes biligin moiyndady. Álihan Bókeihanov kúrdeli tańdaý jasady. Oǵan Ombyda áskermen birge Qiyr Shyǵysqa ketip, ary qarai emigratsiialaný týraly usynys aitylǵan. Ol azamattyq tanytyp, halqynyń qasynda qaldy. Ol basyna qandai qaýip tónip turǵanyna qaramastan osy joldy tańdady», - deidi professor.
Ol Alash ideiasynyń myqty bolǵany sondai – bolshevikter olardy eleýsiz qaldyra almady jáne ymyraǵa kelýge týra keldi. Alash ziialylary Qazaqstannyń shekarasyn bekitýde zor ról atqardy.
«Azamattyq soǵysta alashtyqtar sol kezde jeńilgenmen, tarihi sheshimge kelgen kezde Álihan Bókeihanov pen Alash Ordanyń ózge de kóshbasshylary jeńiske jetti», - deidi ol.
Atalǵan sharany «Aq jol» demokratiialyq partiiasy «Alash» institýtymen birge uiymdastyrdy.
