Elbasymyz N.Á.Nazarbaevtyń «Bolashaqqa baǵdar: rýhani jańǵyrý» atty baǵdarlamalyq maqalasynda ata-dástúrimizdi jalǵastyrý, saqtaý jáne jańǵyrtý tóńireginde talai mindetterdi alǵa qoidy.
Búgingi kúni asa mańyzdy máselelerdiń biri – umyt bolyp bara jatqan dástúrlerdi qaita jańǵyrtý. Bizdiń aýdanymyzda kóp ulttyń ókilderi ómir súredi. El ishinde tatýlyq pen birlikti, beibitshilik pen dostyqty saqtaýdy bizdiń aǵa urpaq óziniń tikelei mindeti dep biledi.
Osyǵan orai Ońtústik Qazaqstan oblysy Tólebi aýdandyq ardagerler keńesiniń, Leńgir qalalyq analar keńesiniń jáne aýdandyq "Qoǵamdyq kelisim" mekemesiniń uiymdastyrýymen «Tarih qoinaýynan syr shertken salt-dástúr» atty aýdandyq baiqaý uiymdastyryldy, dep habarlaidy Ult.kz tilshisi.
Baiqaýǵa aýdandaǵy jalpy bilim beretin mektep oqýshylary, stýdentter, qalalyq jáne aýyldyq okrýg analar keńesiniń músheleri qatysty. Sonymen qatar, arnaiy qonaq bolyp tarih ǵylymdarynyń doktory, professor, RJǴA jáne HTǴA akademigi Sattar Fazyluly Majitov pen aýdandyq ardagerler keńesiniń tóraǵasy Átirhan Shyńǵysbaev keldi.
Salt-dástúrlerimizdiń keibiri halyq arasynda keńinen paidalanylyp júrgen bolsa (aidar taǵý, qonaq káde, bastańǵy jáne t.b.), keibiri umyt qalyp barady. Ásirese jastarymyz bile bermeitin salt-dástúrlerimiz jeterlik. Ata-babalarymyzdan mura bop qalǵan salt-dástúrler árdaiym igi maqsattar úshin qoldanysta bolǵan. Sol sebepti olardy bile júrý, kei-keide ómirde iske asyrý da artyq etpes.
Is-shara baǵdarlamasy bastalmas buryn, Kielitas aýyldyq okrýginiń analar keńesiniń tóraǵasy Aidarkúl Rakisheva qazaqtyń umytylyp bara jatqan «Qazan shegeleý» atty dástúrin sahnalap, erekshe áser qaldyrdy. Bul dástúr – qazaqi qonaq kútýdiń ereksheligin kórsetedi. "Qazan shegeleý" qys ortasy aýyp, kún uzarǵan mezgilde bastalady eken.
Baiqaýdyń sharty boiynsha qatysýshylar ǵasyrlar qoinaýynda qalyp umyt bolǵan dástúrlerdi saqtap, nasihattap, jańartý maqsatynda óz ultynyń bir saltyn kórsetýi tiis bolatyn.
Birinshi bolyp sahnaǵa Sultan Rabat mektebiniń oqýshylary ózbek ultynyń «Lápár aitý» atty dástúrin kórsetti. Oqýshylarmen birge osynaý kórinisti qoiýǵa aýdandyq ózbek ulttyq mádeni ortalyǵynyń jáne analar keńesiniń múshesi Maksýda Djýrabekqyzy kómektesipti.
Taǵy bir tamasha sahnalandyrylǵan kórinisimen №16 Sh.Ýálihanov atyndaǵy mekteptiń oqýshylary kórermen kózaiymy boldy. Oqýshylar túrik ultynyń umyt bolyp bara jatqan «Betashar» dástúrin kórsetti. Túrikterde erekshe til qysqartý dástúri bolady eken. Ol boiynsha jańa túsken kelin ata-enesin syilap, aitqanyn eki etpeý, árdaiym elgezek bolýǵa sert beredi eken. Buny jańa kelinniń tilin pyshaqpen kesý arqyly júzege asyrady. Shoshymańyzdar, árine simvolikalyq túrde. Keliniń basynan pyshaqty qairap, sertin alady. Bul kórinisti sahnalaýǵa túrik ulttyq mádeni ortalyǵynyń jáne analar keńesiniń múshesi Sofia Magaramovna at salysypty.
Sońǵy bolyp sahnaǵa №8 kolledjiniń stýdentteri shyqty. Olar «Salt-dástúrimiz – sanamyzdyń ainasy» dep birden qazaqtyń birneshe dástúrin kórsetti.
Dastarhan kórki nan demekshi, adamdar arasyndaǵy aýyzbirshiliktiń simvoly retinde ár ult ókilderi ózderi pisirgen ulttyq nanynan kórermenderge aýyz tiip otyrýǵa shaqyrdy.
Maqsattary jeńý emes qatysý bolǵan jas órenderdiń ónerin óz deńgeiinde baǵalaǵan ádil qazylar alqasy atynan Sattar Fazyluly kópshilik bile bermeitin ereshke dástúrler jaily sóz qozǵap, uiymdastyrýshylarǵa, qatysýshylarǵa alǵysyn bildirdi.
