Jaqynda Jambyl oblysyndaǵy «Taraz Sý» memlekettik kommýnaldyq kásipornynda tsifrlandyrylǵan jańa ortalyq ashyldy. «Tsifrlyq Qazaqstan» memlekettik baǵdarlamasynyń aiasynda ashylǵan bul ortalyq halyqqa kórsetiletin qyzmet sapasyn arttyrýǵa yqpal etedi.
«Adamdarǵa budan bylai uzyn-sonar kezekke turýdyń qajeti bolmaidy. Óitkeni, munda elektrondy kezek terminaldary ornatylǵan. Buǵan qosa, úiden shyqpai-aq, esep-shottardy tóleýge, qajetti saýaldardy sheshýge bolady. Al eger qajet dep tapsa, operatsiialyq zalǵa kelip, mamandardyń kómegine júginse bolady», – deidi «Taraz Sý» kommýnaldyq kásiporny direktorynyń orynbasary Gúlmira Toqaeva.
Onyń sózinshe, sybailas jemqorlyqtyń aldyn alý úshin osyndai elektrondyq ortalyqtardy ashqan abzal. Munda bir táýlik ishinde myńdaǵan azamatqa qyzmet kórsetýge múmkindik bar.
Óńirde byltyrǵy jyly qalalyq sýmen qamtý júiesi avtomattandyrylsa, jýyrda «aqyldy kvartal» jobasy engiziledi dep kútilýde. Josparǵa sáikes, Tarazdaǵy 315 kópqabatty turǵyn úi «E-Shańyraq» aqparattyq júiesine qosylatyn bolady. Buǵan qosa, kommýnaldyq tólemderdiń biryńǵai esep aiyrysý ortalyǵy da boi kótermek.
Jambyl oblysynda «Tsifrlyq Qazaqstan» memlekettik baǵdarlamasy belsendi túrde júzege asyrylyp jatyr. Onyń aiasynda «Smart Taraz» jobasy jasalý ústinde. Ol óz kezeginde 20 jobany ózine biriktirgen. Bul jobalardyń qataryna: bilim, densaýlyq saqtaý, TKSh (turǵyn úi-kommýnaldyq sharýashylyǵy), transport, agroónerkásip kesheni jáne qaýipsizdik salalary kiredi.
Aita ketsek, aimaqtaǵy jergilikti halyqtyń 99 paiyzy internetpen qamtamasyz etilgen. Iaǵni, óńirde 378 eldimeken bolsa, sonyń 347-si internetpen jabdyqtalǵan. Endigi kezekte internet jyldamdyǵyn odan ári arttyrý baǵytynda birqatar jumystar atqarylýda.
