Taraz qalasyndaǵy oblystyq perinataldyq ortalyqtan úiine shyqqan úshemniń ata-anasyn týystary, sheneýnikter men jýrnalister quttyqtady, dep habarlaidy QazAqparat.
19 shildede Jambyl aýdanyna qarasty Bektóbe aýylynyń 34 jasar turǵyny Elvira Qojageldieva salmaǵy 2 594, 2 125 jáne 1 858 gramm úsh uldy dúniege ákeldi. Analary úshemdi 34 aptalyq merzimde kesar tiligi arqyly bosandy. Elvira men kúieýi sábilerge Islam, Marǵulan jáne Aslan dep at qoidy. «Perzenthanadan shyǵatyn kúnge deiin jas bosanǵan ana men sábiler Jambyl oblystyq perinataldyq ortalyqtyń dárigerleriniń baqylaýynda boldy», dep habarlady oblystyq densaýlyq saqtaý basqarmasynyń baspasóz qyzmeti.
«Men Tarazdaǵy №20 orta mektepte qazaq tili pániniń muǵalimi bolyp jumys isteimin. Joldasym Baqytjan Jidebai «Binom» JShS-da kranshy bolyp qyzmet etedi. Bul meniń tórtinshi ret bala kóterýim, eki qyzym men bir ulym ósip keledi. Al endi Alla taǵy da úsh ul syilady», - deidi jas bosanǵan ana.
Bul kúni baqytty anany quttyqtaý úshin kóptegen týǵan týystary, aiaǵy aýyr kezinde baqylaýynda bolǵan «Almaz medical group» JShS Jambyldaǵy filialynyń qyzmetkerleri kelip, otbasyǵa úsh bala arbasy men kiimder syilady.
Jambyl aýdany ákiminiń orynbasary Úmitken Naimanova ótken jyly Jambyl aýdanyna qarasty Jasórken aýylynda da dál osylai úshem dúniege kelgenin aitty.
Oblystyq perinataldyq ortalyqtyń bas dárigeri Aigúl Aitpaevanyń aitýynsha, jyl basynan beri ortalyqta 3 296 bala dúniege kelgen, olardyń 86 – egiz. Bul – biylǵy jyly týǵan alǵashqy úshem, ótken jyldyń uqsas merziminde eki úshem dúniege kelgen.
