Oblystyq politsiia departamenti Tarazdaǵy «Úmit» balalar úiiniń tárbielenýshilerine qatysty taraǵan videoǵa qatysty aqparat taratty, dep habarlaidy "Ult aqparat".
«Facebook» áleýmettik jelisinde áiel adamnyń «Úmit» balalar úiiniń tárbielenýshilerine qatysty qatygezdik is-áreketin kórsetetin beinejazbasy jariialaǵan bolatyn. Soǵan orai quzyrly organ shuǵyl shara qabyldap, jumystar júrgizilip jatqanyn habarlady.
«Atalǵan balalar úiiniń 54 jastaǵy tárbieshisine qatysty Qylmystyq kodekstiń 140-baby 2-bóligimen sotqa deiingi tergep-tekserý amaldary bastaldy. Tergeý barysynda mekeme qyzmetkerlerinen jaýap alynyp, beinebaqylaý kameralarynyń jazbalary alyndy. Sondai-aq, tiisti saraptamalar taǵaiyndaldy», - dedi oblystyq politsiia departamentiniń basshysy Arman Orazaliev.
Sondai-aq, ol departament tarapynan oblystyq ákimdikke sot sheshimine deiin tárbieshini laýazymynan bosatý týraly usynys joldanǵanyn jetkizdi.
Departament basshysy oqiǵaǵa qatysty barlyq jaǵdai óziniń jeke baqylaýynda bolatynyn aitty.
