Jambyl oblysynyń ortalyǵy Taraz qalasynda karantinge qaramai toi jasaǵandar anyqtaldy,- dep habarlaidy "Ult aqparat".
Jambyl oblysynyń Politsiia departamenti mobildi toptardyń quramynda azamattarǵa maska rejimin, áleýmettik araqashyqtyqty saqtaý qajettigi týraly eskertýdi, sondai-aq virýsty juqtyrýǵa jol bermeý maqsatynda jappai merekelik sharalardan bas tartýdyń mańyzdylyǵyn túsindirýdi jalǵastyrýda.
Mysaly, oblys ortalyǵyndaǵy mobildi toptar 80 adamǵa arnalǵan úilený toiynyń ústinen tústi. Mobildi top ókilderi merekelik sharaǵa tosynnan kirip barǵanda abdyrap qalǵan qonaqtar kelin men kúieý jigitti tastap, qashyp ketpek boldy.
Týra osyndai jaǵdai qaladaǵy kafelerdiń birinde qaitalandy. Onda 8 adam tekserýshiler kelgende jiynnan ketip qalmaq boldy. Kafe basshylyǵy qonaqtaryna mekeme qyzmetkerlerimen birge artqy esikten shyǵyp ketýge múmkindik jasaǵan.
Bul týraly oblystyq Politsiia departamentiniń baspasóz qyzmeti habarlady.
«Politsiia qyzmetkerleri zańbuzýshylarǵa túsindirý jumystaryn júrgizip, barlyq is-sharalardy uiymdastyrýshylarǵa qatysty QR ÁQBtK-niń 425-baby «Halyqtyń sanitariialyq-epidemiologiialyq salaýattylyǵy salasyndaǵy zańnama talaptaryn, sondai-aq gigienalyq normativterdi buzý» boiynsha ákimshilik hattamalar toltyrdy. Jinalǵan materialdar ákimshilik jaýapqa tartý úshin sanitariialyq-epidemiologiialyq baqylaý komitetine joldandy»,-delingen habarlamada.
Politsiia departamenti Jambyl oblysynyń barlyq turǵyndary men qonaqtaryna týystary men jaqyndarynyń densaýlyǵyn saqtaý maqsatynda buqaralyq jáne ujymdyq is-sharalardan bas tartýǵa shaqyrady.
