Taraz qalasynda 7 sáýir kúni karantinge jabylǵan kóppáterli turǵyn úidiń bir kireberisi ashyldy, dep habarlaidy "Ult aqparat" Taraz qalasy ákimdigine silteme jasap.
Taraz qalasynda 7 sáýir kúni koronavirýs infektsiiasyn juqtyrǵan 86 jastaǵy áiel tirkelip, naýqas anyqtalǵan «Qarasý alqaby» shaǵynaýdanyndaǵy kóppáterli turǵyn úidiń kireberisi karantinge jabylǵan bolatyn. Epidemiologiialyq tekserý barysynda turǵynnyń 17 naýryz kúni Almaty qalasynan kelgen jaqyn týysymen bailanysta bolǵany anyqtalyp, ol infektsiialyq statsionarǵa jatqyzylǵan. Al, onymen bailanysta bolǵan 5 adam anyqtalyp, olar da karantinge ornalastyryldy.
Atalǵan turǵyn úidiń kireberisinde jáne turǵynnyń turǵylyqty jeri boiynsha dezinfektsiialyq óńdeý sharalary júrgizilgen. Osy kireberistegi páterlerde turatyn turǵyndar 14 kúnge oqshaýlanyp, olarǵa úiinen shyǵýǵa tyiym salynǵan bolatyn.
Taraz qalalyq taýarlar men kórsetiletin qyzmetterdiń sapasy men qyzmetterin baqylaý basqarmasy basshysynyń orynbasary Ǵabit Ábdildániń aitýynsha, bul kireberiste oqshaýlanǵan 26 turǵynnyń 11-i 18-ge tolmaǵan balalar, al 15-i eresek adamdar. Osy 14 kún ishinde olardyń densaýlyq jaǵdailary jergilikti emhanada baqylanyp, eshqandai aýytqý belgileri baiqalmaǵan.
Oqshaýlanǵan kireberistiń turǵyndaryna eki apta páterlerinen shyǵýyna tyiym salynyp, osy aralyqta Taraz qalasynyń ákimdigi páter turǵyndaryn azyq-túlik ónimderimen qamtamasyz etken. Búgin Taraz qalasynyń ákimdigi sol «Qarasý alqaby» shaǵynaýdanyndaǵy turǵyn úi kireberisiniń karantindik rejiminiń aiaqtalǵanyn málimdedi. Karantinge jabylǵan turǵyndarǵa tek jergilikti bilik qana emes, kásipkerler men belsendi azamattar da qoldaý kórsetken bolatyn.
«Biz sanepidqadaǵalaý mekemesiniń talaptaryna sai 14 kún boiy úiden shyqpai, meditsina qyzmetkerleriniń kúndelikti baqylaýynda boldyq. Sonyń arqasynda basqa eshkimnen virýs shyqqan joq. Osy 14 kún ishinde qala ákimdigi men demeýshilerdiń kómegimen bizge kúndelikti azyq-túligimiz ben ystyq tamaǵymyz jetkizilip otyrdy. Sol úshin azamattarǵa alǵysymyzdy aitamyz», - dedi atalǵan turǵyn úidiń turǵyny Aiagóz Mailiev.
