Jambyl oblysynyń ákimi Berdibek Saparbaev jumys barysymen Taraz qalasyndaǵy densaýlyq saqtaý nysandaryn aralady. Eń aldymen aimaq basshysy Tarazdaǵy kópbeiindi aýrýhananyń infektsiialyq blogynyń jai-kúiin barlady, dep habarlaidy "Ult aqparat" oblys ákimdiiginiń resmi saityna silteme jasap.
Kezinde perinataldyq ortalyq bolǵan ǵimarat biraz ýaqyt bos turǵan edi. Endi qazir munda kúrdeli jóndeý jumystary qolǵa alynǵan. Joba boiynsha, munda 200 tósek orynǵan arnalǵan infektsiondy statsionar bolmaq. Qazirgi ýaqytta 100 meditsinalyq fýnktsionaldy kereýet satyp alyndy.
Sondai-aq, qan gazdary men elektrolitterdi anyqtaýǵa arnalǵan bir avtomatty analizator, ottegi stantsiiasy, kompiýterlik tomograf, 50 meditsinalyq fýnktsionaldy kereýet jáne 30 reanimatsiialyq tósek satyp alý kózdelip otyr.
Merdiger «Talas-qurylys» JShS búginde jumystyń 90 paiyzyn aiaqtaǵan. Ishindegi kommýnaldyq jelilerdi tolyǵymen jańartypty. Ǵimaratty aralap shyqqan Berdibek Saparbaev nysannyń mańyzdylyǵyn erekshe atap ótti.
«Erteń indettiń ekinshi tolqyny bola qalǵan jaǵdaida biz daiyn bolýymyz kerek. Myna ǵimarat arqyly naýqastarǵa kómek berý qaýqarymyz artady. Eń bastysy sapaly jumys atqarylýy kerek. Bul jóndeý jumystaryna nemquraily qaraýǵa bolmaidy»,- dep eskertti oblys ákimi.
Aimaq basshysy sondai-aq aýrýhana aýlasyn kógaldandyrýǵa da mán berdi. Merdiger barlyq jumystardy 17-shi qarashaǵa deiin aiaqtaýy tiis.
Berdibek Saparbaev sondai-aq, kóp beiindi aýrýhananyń negizgi korpýsyna da arnaiy bardy. Palatalardy aralap, emdeý mekemesniń materialdyqtehnikalyq jabdyqtalýyn óz kózimen kórdi. Aimaq basshysyna jaqynda ǵana kelgen úsh túrli ókpeni jasandy jeldetý apparattary kórsetildi. Bir ereksheligi, aýrýhananyń ózinde ottegi stantsiiasy bar. Sol arqyly ishtegi kontsentratorlar naýqastarǵa qajetti ottegi kólemin berýge qaýqarly.
Oblys ákimi emdeý mekemesiniń tirkeý ornyna kelip, túsken naýqastan alynǵan PTR-synama qansha ýaqytta daiyn bolatynyn surady. Ondaǵy qyzmetker sońǵy alynǵan nátijeni qaǵaz betine shyǵaryp kórsetti. Oǵan sáikes, tańerteń alynǵan synamanyń nátijesi tústen keiin shyǵatyny kórsetilgen.
Berdibek Saparbaev aýrýhananyń dári-dármek qoryn tekserdi. Oǵan jaýapty qyzmetkerler qazan aiyna qajet bolǵan dárilik zattar tolyǵymen jetkizilip, qazir qarasha aiyna berilgen tapsyrystar jetkizilip jatqanyn aitty. Kei dárilik zattardyń - 1,5, al keibiriniń 3-4 aiǵa deiin jetetin qory bar eken.
