Jambyl oblysynyń 80 jyldyǵyna orai oblys ortalyǵynda «Áýender álemi» alańynyń saltanatty ashylý rásimi ótti, dep habarlaidy "Ult aqparat".
Nysan Y.Dúkenuly atyndaǵy qalalyq Mádeniet úiiniń mańynda ornalasqan. Aýmaǵy 700 sharshy metrden asady. Buǵan deiin qaraýsyz jatqan alań mańyndaǵy alleia qaita jańǵyrtylyp, qalpyna keltirilýde.
Aita keteiik, elimizdiń atyn álemge tanytyp júrgen mýzyka óneri qairatkerleriniń shyǵarmashylyǵyn nasihattap, ónegeli ómir jolyn búgingi urpaqqa úlgi etý maqsatynda ashylǵan alańnyń ortasyna óner ieleriniń qurmetine arnalǵan stella qoiylǵan. Onyń biiktigi – 6,5 metr. Stelanyń ainalasyna otyz tuǵyr tas ornatylǵan. Olarǵa qoiylǵan alpys juldyz belgisine elimizdiń mádenietine úlken úles qosqan tulǵalar men óner juldyzdarynyń esimderi jazylǵan. Stellanyń tuǵyryna J.Jabaev, B.Sholaq, Y.Dúkenuly, K.Ázirbaevtyń óner týraly qanatty sózderi qashalyp jazylǵan.
Nysannyń ashylý saltanatynda Qazaqstannyń jáne Qyrǵyzstannyń Halyq ártisi, Qazaqstan Respýblikasynyń memlekettik syilyǵynyń laýreaty Altynbek Qorazbaev sóz sóilep, keiingi jyldardaǵy óńirdegi órkendi ister týraly aita kele, rýhaniiat pen mádeniet baǵytynda atqarylyp jatqan júieli jumystarǵa toqtaldy. Sondai-aq ol ashylǵaly otyrǵan nysannyń oblystan shyqqan óner adamdaryna degen sheksiz qurmettik belgisi ekendigin marqaia jetkizdi. Shara barysynda aimaq basshysy Asqar Myrzahmetov «Áýender álemi» alańyna esimderi jazylǵan ónerpazdarǵa sertifikattar tabystap, óner men ómirde sáttilik tiledi.
Jambyl óńiri elimizdiń óner áleminde qanatyn keńge jaiǵan jaisańdardan kende emes. Olar tek oblysqa ǵana emes, barsha elimizdiń maqtanyshyna da ainalýda. Qazaq án-kúi ónerindegi tulǵalar Balýan Sholaq, Yqylas Dúkenuly, Kenen Ázirbaev, Ilia Jaqanov, Altynbek Qorazbaev, Mels Ózbekov jáne taǵy basqalardy airyqsha atap aitýǵa bolady. Búginde osy tulǵalardyń iziń jalǵap kele jatqan talanttar az emes. Bul alań solardyń ónerine degen qurmet belgisi desek qatelespeimiz.
