جامبىل وبلىسىنىڭ 80 جىلدىعىنا وراي وبلىس ورتالىعىندا «ەۋەندەر ەلەمٸ» الاڭىنىڭ سالتاناتتى اشىلۋ رەسٸمٸ ٶتتٸ, دەپ حابارلايدى "ۇلت اقپارات".
نىسان ى.دٷكەنۇلى اتىنداعى قالالىق مەدەنيەت ٷيٸنٸڭ ماڭىندا ورنالاسقان. اۋماعى 700 شارشى مەتردەن اسادى. بۇعان دەيٸن قاراۋسىز جاتقان الاڭ ماڭىنداعى اللەيا قايتا جاڭعىرتىلىپ, قالپىنا كەلتٸرٸلۋدە.
ايتا كەتەيٸك, ەلٸمٸزدٸڭ اتىن ەلەمگە تانىتىپ جٷرگەن مۋزىكا ٶنەرٸ قايراتكەرلەرٸنٸڭ شىعارماشىلىعىن ناسيحاتتاپ, ٶنەگەلٸ ٶمٸر جولىن بٷگٸنگٸ ۇرپاققا ٷلگٸ ەتۋ ماقساتىندا اشىلعان الاڭنىڭ ورتاسىنا ٶنەر يەلەرٸنٸڭ قۇرمەتٸنە ارنالعان ستەللا قويىلعان. ونىڭ بيٸكتٸگٸ – 6,5 مەتر. ستەلانىڭ اينالاسىنا وتىز تۇعىر تاس ورناتىلعان. ولارعا قويىلعان الپىس جۇلدىز بەلگٸسٸنە ەلٸمٸزدٸڭ مەدەنيەتٸنە ٷلكەن ٷلەس قوسقان تۇلعالار مەن ٶنەر جۇلدىزدارىنىڭ ەسٸمدەرٸ جازىلعان. ستەللانىڭ تۇعىرىنا ج.جاباەۆ, ب.شولاق, ى.دٷكەنۇلى, ك.ەزٸرباەۆتىڭ ٶنەر تۋرالى قاناتتى سٶزدەرٸ قاشالىپ جازىلعان.
نىساننىڭ اشىلۋ سالتاناتىندا قازاقستاننىڭ جەنە قىرعىزستاننىڭ حالىق ەرتٸسٸ, قازاقستان رەسپۋبليكاسىنىڭ مەملەكەتتٸك سىيلىعىنىڭ لاۋرەاتى التىنبەك قورازباەۆ سٶز سٶيلەپ, كەيٸنگٸ جىلدارداعى ٶڭٸردەگٸ ٶركەندٸ ٸستەر تۋرالى ايتا كەلە, رۋحانييات پەن مەدەنيەت باعىتىندا اتقارىلىپ جاتقان جٷيەلٸ جۇمىستارعا توقتالدى. سونداي-اق ول اشىلعالى وتىرعان نىساننىڭ وبلىستان شىققان ٶنەر ادامدارىنا دەگەن شەكسٸز قۇرمەتتٸك بەلگٸسٸ ەكەندٸگٸن مارقايا جەتكٸزدٸ. شارا بارىسىندا ايماق باسشىسى اسقار مىرزاحمەتوۆ «ەۋەندەر ەلەمٸ» الاڭىنا ەسٸمدەرٸ جازىلعان ٶنەرپازدارعا سەرتيفيكاتتار تابىستاپ, ٶنەر مەن ٶمٸردە سەتتٸلٸك تٸلەدٸ.
جامبىل ٶڭٸرٸ ەلٸمٸزدٸڭ ٶنەر ەلەمٸندە قاناتىن كەڭگە جايعان جايساڭداردان كەندە ەمەس. ولار تەك وبلىسقا عانا ەمەس, بارشا ەلٸمٸزدٸڭ ماقتانىشىنا دا اينالۋدا. قازاق ەن-كٷي ٶنەرٸندەگٸ تۇلعالار بالۋان شولاق, ىقىلاس دٷكەنۇلى, كەنەن ەزٸرباەۆ, يليا جاقانوۆ, التىنبەك قورازباەۆ, مەلس ٶزبەكوۆ جەنە تاعى باسقالاردى ايرىقشا اتاپ ايتۋعا بولادى. بٷگٸندە وسى تۇلعالاردىڭ ٸزٸڭ جالعاپ كەلە جاتقان تالانتتار از ەمەس. بۇل الاڭ سولاردىڭ ٶنەرٸنە دەگەن قۇرمەت بەلگٸسٸ دەسەك قاتەلەسپەيمٸز.
