Búgin Jambyl oblysynyń 80 jyldyǵy atap ótilýde. Jańa formatta ótip jatqan mereitoi barysynda birqatar nysandar paidalanýǵa berildi. Eń aldymen oblystyq qazaq drama teatrynyń aldyna ornatylǵan Asqar Toqpanovtyń eskertkishi ashyldy, dep habarlaidy "Ult aqparat".
Jambyl oblysynyń 80 jyldyǵyna arnalyp ashylǵan rýhani nysandardyń kóshin A.Toqpanovtyń eskertkishi bastady. Asqar Toqpanov oblystyq qazaq drama teatrynyń negizin qalaǵan, ondaǵy shyǵarmashylyq ujymynyń kásibi biliktiligin jetildirýge óz qoltańbasyn qaldyrǵan elimizge tanymal rejisser.
Eskertkishtiń lentasyn KSRO jáne Qazaqstannyń Halyq ártisi, Qazaqstannyń Eńbek Eri Asanáli Áshimov pen Qazaqstan Teatr qairatkerleri odaǵynyń tóraǵasy, Asqar Toqpanovtyń shákirti, Qazaqstannyń Halyq ártisi Tuńǵyshbai Jamanqulov, Qazaqstannyń halyq ártisi, professor Esmuhan Obaev qidy. Olar tulǵa týraly esti estelikteri men taǵylymdy oilaryn ortaǵa salyp, A.Toqpanovtyń eskertkishiniń oblystyq teatr aldynan ashylyp otyrǵanyn óte oryndy sheshim bolǵanyn basa aitty. Eskertkishke QR Mádeniet jáne sport ministri A.Raiymqulova, oblys ákimi A.Myrzahmetov jáne birqatar ziialy qaýym ókilderi yqylas gúlin qoidy.
Asqar Toqpanov — joǵary bilimdi túńǵysh ulttyq kásibi rejisser, Qazaqstan teatr óneriniń kórnekti qairatkerleriniń biri, Qazaqstannyń halyq artisi. Ol 1915 jyly qazan aiynda Almaty oblysynyń Ile aýdanyna qarasty № 2 aýylda dúniege kelgen. 1939 jyly Máskeýdiń memlekettik A.V.Lýnacharskii atyndaǵy teatr óneri institýtynyń rejisserlik fakýltetin támamdaǵan soń respýblikamyzdyń teatr ómirine zor eńbek sińirgen tulǵa.
Aita keterlik taǵy bir jait, búgingi is-shara barysynda A.Toqpanovtyń ómiri men shyǵarmashylyǵy jónindegi «Toqpanov tulǵasy» atty estelik kitaptyń tusaýkeser rásimi ótti. Qonaqtar úshin A.Toqpanovtyń qyzmet joly, eńbekteri, nagradalary, shákirtteri jaily fotostend uiymdastyrylyp, tulǵa týraly derekti film kórsetildi.
Sonymen qatar, búginde Jambyl oblystyq qazaq drama teatryna qazaqtyń tuńǵysh kásibi rejisseri, halyq ártisi Asqar Toqpanovtyń esimin berý boiynsha tiisti jumystar júrgizilýde. Respýblikalyq onomastikalyq komissiiadan qoldaý tapqan bul usynys boiynsha qazir Úkimet qaýlysynyń jobasy daiyndalýda.
Oblys teatryna tulǵanyń esimin berý - ónersúier qaýymnyń kópten bergi arman-tilegi bolatyn. Óitkeni qazaq óneriniń damýyna ólsheýsiz úles qosqan tulǵa óz eńbek jolynda Jambyl oblystyq qazaq teatrynda da eleýli eńbek etken. Kóptegen qoiylymdar sahnalap, shákirtter tárbielegen.
Bul usynysty osydan 10-15 jyl buryn Asanáli Áshimov, Sábit Orazbaev, Tuńǵyshbai Jamanqulov sekildi teatr sańlaqtary kóterip, usynys hat jazǵanymen, jaýapsyz qalǵan edi. Oblys ákimi Asqar Isabekuly osy máseleni Úkimet, Mádeniet ministrligi deńgeiinde kóterip, igi bastama óz sheshimin tabýda.
A. Toqpanov esimi buǵan deiin elimizde eshqandai teatr men óner ujymyna berilmegen. Al 1936 jyly qurylǵan oblystyq qazaq drama teatry osy jyldar boiy birde-bir tulǵanyń atymen atalmaǵan. Osy turǵydan alǵanda bul bastama kópshilikten zor qoldaý tabýda.
Teatr rejisseriniń músinin belgili músinshi Momysh Sultan jasap shyqty. Onyń qurylysyna tanymal metsenat «Super pharm» jaýapkershiligi shekteýli seriktestiginiń direktory Qairat Qaimoldaev demeýshilik etken.
