Taraz qalasynda osydan bes jyl buryn asa qaýipti qylmyskerdi ustaý barysynda aýyr jaraqat alǵan politsei Bekjan Tilenshiev uzaq naýqastan qaitys boldy, dep habarlaidy "Ult aqparat".
Taraz qalalyq IIB jol-patrýldeý politsiiasy batalonynyń politseii, serjant Bekjan Tilenshiev 32 jasqa qaraǵan shaǵynda qaitys boldy.
Tártip saqshysy 5 jyl buryn qaýipti qylmyskerdi ustaý kezinde aýyr jaraqat alǵan edi. Bul týraly Jambyl oblysy politsiia departamentiniń baspasóz qyzmeti habarlady.
«Bekjan Tilenshiev 1989 jyly 22 qazanda Jambyl oblysy Jýaly aýdany Shaqpaq ata aýylynda dúniege kelgen. 2010 jyly Almaty memlekettik biznes kolledjin aiaqtaǵan soń Qazaqstan qarýly kúshteriniń qataryna shaqyrylǵan. Al 2013 jyldan bastap quqyq qorǵaý organdarynda qyzmet ete bastaǵan. 2016 jyly 19 maýsym kúni ol sýyq qarýlanǵan asa qaýipti qylmyskerdi ustaý kezinde moiny men keýdesine oq tiip, aýyr jaraqat alǵan», - delingen PD habarlamasynda.
2016 jyldyń 5 jeltoqsanynda Qazaqstan Prezidentiniń jarlyǵymen Bekjan Tilenshiev «Erligi úshin» medalimen marapattaldy.
2017 jyldyń sáýir aiynda ol densaýlyǵyna bailanysty ishki ister organdarynan bosatyldy.
Bekjan Tilenshiev uzaq ýaqyt boiy elimizde jáne shetelde emdelgen. Alaida buǵan qaramastan onyń densaýlyǵy jaqsarmaǵan.
Áriptesiniń qazasyna bailanysty Jambyl oblysy politsiia departamentiniń jeke quramy men basshylyǵy, sondai-aq ardagerler keńesi onyń otbasyna kóńil aitty.
