Foto: stan.kz
Taraz qalasynyń eki turǵyny reiderlik áreketi úshin sottaldy, dep habarlaidy "Ult aqparat" Qarjy monitoringi komitetiniń baspasóz qyzmetine silteme jasap.
Komitettiń Jambyl oblysy boiynsha Ekonomikalyq tergeý departamenti eki turǵynǵa qatysty zańdy tulǵaǵa zańsyz baqylaý ornatý (reiderlik) faktisi boiynsha qylmystyq isti tergedi.
Tergeý barysynda 2004-2011 jyldar aralyǵynda barlyǵy úsh kásiporyn - «Taraz InKom» JShS, «Indýstrialnyi resýrs» JShS, «NNP Convergo Nursad» JShS qurylyp, olardaǵy úles aiyptalýshylar (3 kompaniiadaǵy úles : 40%, 49%, 50%) jáne jábirlenýshi tarap (3 kompaniiadaǵy úlesi: 20%, 51%, 50%) arasynda teń emes bólikke bólingendigi anyqtaldy.
«2018-2020 jyldary Taraz qalasynda aldyn-ala sóz bailasa otyryp, eki sybailas joǵaryda atalǵan kásiporyndar boiynsha 100% qatysýshylardyń jalpy jinalysynyń resmi kvorýmyn jariialai otyryp, jalpy jinalystardyń hattamalaryn jasady, ózderi jinalystyń tóraǵasy jáne hatshysy retinde hattamaǵa qol qoiǵan. Bul rette zardap shekken taraptyń ornyna da qol qoiǵan.
Jalpy jinalystyń qorytyndylary boiynsha aiyptalýshylardyń birin shottar ashý, bank kartalarynda jáne qarjylyq qujattarda, kelisimsharttarda birinshi qol qoiý quqyǵymen, kásiporyndardyń bank shottaryndaǵy qarajattardy ielikten shyǵarý quqyǵymen seriktestikterdiń direktory etip taǵaiyndaý týraly sheshimder qabyldanady, sondai-aq ádilet organdaryndaǵy zańdy mekenjailary ózgertiledi.
Osylaisha, jábirlenýshi tarap kásiporyndardaǵy qatysýshynyń úlesinen aiyryldy», delingen habarlamada.
Taraz qalasynyń №2 sotynyń ókimimen Qylmystyq kodekstiń 249-baby, 2-bóligi, 1-2-tarmaǵyna sáikes aiyptalýshy R.Nurbaev jáne B.Bekov shartty túrde 3 jylǵa sottaldy.
