Almatyda aktrisa Dariǵa Badyqovanyń alǵashqy tolyqmetrajdy filminiń tusaýkeseri ótti. Basty rólderde: Dariǵa Badyqova, Oljas Abai. Qoiýshy rejisseri – Anvar Matjanov, – dep habarlaidy «Ult aqparat».
«Taptym-aý seni» kinotýyndysynyń jelisi boiynsha, Səýle men Jeksen (Djekson) – bir aýylda turatyn dostar. Ekeýi bala kezde boks sektsiiasynda tanysqan. Qymyzdy qalaǵa aparyp satýmen ainalysady. Səýle liýlkasy bar mototsikl aidaidy. Jeksenniń əjesi úilenbei júrgen nemeresine qyz taýyp ber dep Səýlege buiymtaiyn aitady. Səýle kómektesýge kelisedi. Sóitip eki dos ártúrli qyzyqqa tap bolady.
«Taptym-aý seni» filmi – aktrisa, prodiýser Dariǵa Badyqovanyń prodiýserlik etken alǵashqy týyndysy. Túsirilim tobynda 50-ge jýyq kino mamany qyzmet etti. Onyń ishinde NOMAD STUNTS halyqaralyq kásibi kaskaderler tobynyń músheleri de bar. Sondai-aq bul kinoda Nurgúl Daýbaeva, Saltanat Qudaibergen, Álihan Ydyrysheva, Jazira Erkin, Ásel Asqar, Gúlmira Jakilina, Ashat Úrpekov syndy akterler óner kórsetti.
Túsirilim jumystary Almaty oblysy, Eńbekshiqazaq aýdany, Taýtúrgen, Túrgen, Qarakemer aýyldarynda ótti. Túsirilim jumystary 22 kúnge sozylǵan. Oǵan qosa bir ai daiyndyq kezeńi men postprodakshn ýaqyty bes aiǵa sozyldy.
Sondai-aq «Taptym-aý seni» kinosynyń saýndtregi arnaiy jazyldy. Aqberen Elgezektiń sózine, kompozitor Talǵat Lestiń ánine jazylǵan oryndaýshy Ǵazizhan Shekerbekovtyń «Sezim úshin» ánin Dariǵa Badyqova men Oljas Abai jańasha oryndap shyqty. Bul án áleýmettik jelide keń taralyp, YouTube-ta 10 000 000 qaralym jinady.
1 jeltoqsannan bastap úlken ekranǵa jol tartatyn «Taptym-aý seni» filmin prodiýser qaryz alyp, táýekel etken.
«Bul týyndyny eki qurbymnan qaryz alyp túsirdim. Sizderden eshteńe jasyrmaimyn. Bul film ákemniń rýhyna arnalady. Prodiýser bolǵanymdy áli sezinbedim. Mende «prodiýser boldym, ózimdi bir basqasha ustaiyn» degen nárse joq. Ózimnen kishilerge kásibi jumys isteýdi, sapaly ómir súrýdi úiretkim keledi. Bul filmdi qatty ýaiymdaimyn. Osy týyndy arqyly júregimniń túbindegi bir dúnieni shyǵarǵandai boldym. Bul ár áiel zatynyń turmys-tirshiliginde kezdesetin jaǵdai. Film túsirýdegi maqsatym - aqsha tabý emes. Ózimdi basqa obrazda kórsetkim keldi. Áitpese, 7 jyl boiy «Kelinjanmen» tanyldym ǵoi. Áieldiń rólinen erkekshora rólge ótý ońai bolmady. Tórt kún boiy túsirilim alańynda kúlkige qaldym. Maǵan eshkim senbedi. Kóńil-kúiim tústi. Rejisser, operator degenderdiń bári syrttan baqylaýshylar ǵoi. Eshkim unatpaidy, rejisser tipti ýaiymdady. Qatty ýaiym boldy. Biraq men jaqsy tásil taptym. Ózimdi ujymǵa, Oljasqa tolyq senip tapsyrdym. Kóp sóilemeýge, qabaǵymdy túiip júrýge tyrystym», – dedi Dariǵa Badyqova.
