Bilim jáne ǵylym ministri Ashat Aimaǵambetov Memleket basshysy Qasym-Jomart Toqaevtyń mektep baǵdarlamasyna «Balalardyń ekologiialyq bilimi» atty jańa pán engizý tapsyrmasy mindetti túrde oryndalatynyn málim etti, dep habarlaidy QazAqparat.
«Prezidenttiń tapsyrmasy bar. Bul tapsyrma mindetti túrde oryndalady. Ádistemelik kózqaras, jalpyǵa ortaq memlekettik standart, bul mindetti durys oryndaý, ǵylymi amal-ádis turǵysynan áriptesterimiz tiisti sheshimdi ázirleýde. Iaǵni oqý jospary men oqý baǵdarlamasynyń ǵylymi negizdemesi bolýy kerek. Balanyń aqparatty qabyldaý jasyna bailanysty taldaý jasalady. Kóptegen faktor zertteledi. Osyǵan bailanysty ǵalymdarymyz ben ádiskerlerimiz bul máselemen ainalysýda», - dedi Ashat Aimaǵambetov Bilim jáne ǵylym ministrliginiń onlain formattaǵy tilshilermen kezdesýinde.
Al osy mán mektep baǵdarlamasyna biyl engizile me? Bul suraqqa jaýap bergen ministr eń aldymen júktelgen mindet sapaly iske asyrylýy kerektigin aitty.
«Osynaý óte durys ideiany sapaly túrde júzege asyrý kerek. Bul turǵyda kez kelgen pedagog tiisti kadr, baǵdarlama, oqýlyqtar kerektigin biledi. Sol úshin eń aldymen mindettiń durys oryndalatynyna basa mańyz beremiz», - dedi ol.
