Tanymal túrkolog, Ulttyq Ǵylym akademiiasynyń akademigi, professor Keńesbai Musaev 89 jasynda dúnieden ozdy, dep habarlaidy "Ult aqparat".
Keńesbai Musaev Túrkistan oblysyna qarasty Sozaq aýdanynda týǵan. Máskeýde jarty ǵasyrǵa jýyq jemisti eńbek etip, 320-dan astam ǵylymi eńbek jariialady. Onyń ishinde túrkologiia máselelerine arnalǵan 14 kitaptyń avtory, «Parasat» ordeniniń iegeri.
2004 jyly Resei Federatsiiasynyń ǵylymǵa eńbegi sińgen qairatkeri ataǵy berilgen.
Sonymen qatar ol «Túrik tili» qoǵamynyń qurmetti múshesi jáne Máskeýdegi «Qazaq tili» qoǵamynyń qurmetti tóraǵasy.
Ǵalym biyl 24 naýryzda 89 jasqa kelgen edi. Ol negizinen qypshaq tobyndaǵy tilderdiń leksikasyn salystyrmaly-tarihi turǵyda zerttedi. «Qaraiym tiliniń grammatikasy» (1964), «Leksika tiýrkskih iazykov» (1975), «Leksikologiia tiýrkskih iazykov» (1984), «Razvitie terminologii na iazykah soiýznyh respýblik SSSR» (1986-1987) atty eki tomdyq eńbektiń jaýapty redaktory boldy ári qazaq terminologiiasy bólimin jazdy. Máskeýdegi «Qazaq tili» qoǵamynyń tóraǵasy retinde de tilge qyzmet etti. Túrkitanýshylar, tilshi ǵalymdar onyń eńbekterimen jaqsy tanys. Keńesbai Musaev myqty leksikolog, belgili túrkitanýshy ǵalym, qazaq lingvisteriniń Reseidegi belgili ókili edi.
