Petropavlda politseidiń der kezinde aralasýynyń arqasynda 49 jastaǵy turǵyn 3 million teńgesin alaiaqtarǵa aýdarýdan aman qaldy. Slesar bolyp jumys isteitin azamat qaskóilerdiń sózine senip, aqshasyn «qaýipsiz shotqa» jibermek bolǵan, dep habarlaidy ult.kz.
Polisia.kz málimetinshe, oqiǵa qaladaǵy saýda úileriniń birinde bolǵan. Politsiia aǵa leitenanty Erkebulan Qurbaniiazov bankomat janynda telefonmen uzaq sóilesip, qobaljyp turǵan er adamdy baiqaidy. Onyń qolyndaǵy pakettiń ishinen aqsha býmalary kórinip turǵan.
Politsei azamatqa alaiaqtardyń arbaýyna túsýi múmkin ekenin eskertken. Alaida telefondaǵy qaskóiler oǵan politsiia qyzmetkerlerine de senbeýdi aityp, kúdigin kúsheitken. Soǵan qaramastan, politseidiń tabandylyǵynyń arqasynda er adam aqshasyn aýdarýdan bas tartqan.
Aldymen er adamǵa avtomatty daýys habarlasyp, elektrondy tsifrlyq qoltańbasynyń merzimin uzartý úshin «1» sanyn basýdy usynǵan. Keiin ózin bank qyzmetkeri retinde tanystyrǵan adam onyń atyna nesie rásimdelip jatqanyn aityp, máseleni sheshý úshin kredit alyp, aqshany «qaýipsiz shotqa» aýdarýǵa kóndirgen.
Osylaisha, azamat 3 million teńgesinen aiyrylyp qala jazdady. Politsiia turǵyndardy beitanys adamdardyń nusqaýymen aqsha aýdarmaýǵa jáne «qaýipsiz shot» týraly usynystarǵa senbeýge shaqyrady.
