Sybailas jemqorlyqpen kúres baǵytynda osy taqyrypta jumys isteitin karikatýrashylar arasynda baiqaý uiymdastyrý kerek.
Bul týraly QR Ulttyq akademiialyq kitaphanasynda ótken «Parasat joly» jobasynyń tanystyrylymynda satirik Kópen Ámirbek aitty, dep habarlaidy QazAqparat.
«Buryn «Ara» satiralyq jýrnalynyń atyn estigen adam eleń ete qalar edi. Qoǵam jaqsy qasietterinen aiyrylyp qaldy. Statistikaǵa kóz júgirtsem, myńnan astam memlekettik qyzmetkerge qatysty qylmystyq is qozǵalǵan. Sol memlekettik qyzmetkerler bizdi sybailas jemqorlyqpen kúresýge shaqyryp júrgen joq pa? Sonda biz kimmen kúresýimiz kerek? Qazir sybailas jemqorlyqtyń tamyryn joiýǵa úndegendermen kúresýimizge týra keledi», - deidi satirik Kópen Ámirbek.
Ol sybailas jemqorlyqqa qarsy jumys atqarylyp jatqanyn, sol jumystardyń biri – búgingi kezdesý ekenin aitty.
«Byltyr 80 million turǵyny bar Germaniiaǵa baryp qaittym. Ol jaqta sońǵy 30 jylda birde bir sheneýnikke qatysty qylmystyq is qozǵalmaǵan. Mine, qaidan úlgi alý kerek! Al bizdiń qoǵamdaǵy jaǵdai qalai? Aqushtap Baqtygereeva durys aitady, qazaqtar balasyn qalai tárbielegen? «Balam, uiat bolady» degen úsh-aq aýyz sózben tárbielegen. Qazaq halqynda osy máselege qatysty qanshama maqal-mátel, qanatty sóz bar», - deidi ol.
Ol sybailas jemqorlyqpen kúresý úshin osy taqyrypta jumys isteitin karikatýrashylarǵa arnalǵan baiqaý uiymdastyrýǵa bolatynyn aitty.
«Bul máselege syni kózben qaraý kerek, sol sebepti «Ara» jýrnalyn qazirgi zaman talabyna sai jańa formatta shyǵara bastaý kerek. Mysaly, sait ashýǵa bolady. Para alatyn, jekmqorlyqpen ainalysatyndarǵa qatysty karikatýradan baiqaý ótkizý kerek. Sonda jumys alǵa basady. Usynysym oryndy dep tapsańyzdar – men qol ushyn sozýǵa daiynmyn», - deidi satirik Kópen Ámirbek.
