Qazaqstanda búgin ótip jatqan QR Parlamenti Májilisi men máslihat depýtattaryn sailaýda belgili óner juldyzdary belsendilik kórsetti, dep habarlaidy QazAqparat.
Óner juldyzdarynyń saiasi belsendiligi Instagram paraqshasynan baiqaldy.
Atap aitqanda, belgili ánshi Altynai Jorabaeva Nur-Sultan qalasyndaǵy sailaý ýchaskesine baryp, óz tańdaýyn jasaǵanyn paraqshasynda jazdy.
«Men óz tańdaýymdy jasadym, eldiń turaqtylyǵy men bereke-birligi úshin, eldiń amandyǵy men tynyshtyǵy úshin! Meniń tańdaýym - turaqty Qazaqstan jáne údemeli damý» dep jazdy ánshi.
Al, opera ánshisi, jaqynda Shymkent qalasyndaǵy Opera jáne balet teatry basshysy bop barǵan Maira Muhamedqyzy da sailaý ýchaskesine baryp daýys bergeni jaily jazba jariialaǵan.
«Al qurmetti Shymkent qalasynyń turǵyndary! Sizderdi búgingi ótip jatqan sailaý naýqanyna qatysyp óz azamattyq mindetińizben daýsyńyzdy sailaýǵa qatysqan úmitkerlerge berýge shaqyramyn. Maǵan tileýshi bolǵan halqyma myń alǵys. Jumysymdy bastap kettim», - dedi ol jazbasynda.
Ánshi, MýzArt tobynyń múshesi Sáken Maiǵaziev te 74 jastaǵy anasymen birge Shymkent qalasyndaǵy sailaý ýchaskesinde bolǵan.
«Qazaq elin bir Alla qoldasyn! Men óz tańdaýymdy jasadym», - dep jazdy ol.
Ánshi Baǵlan Ábdiraiymov ta búgin Almatyda daýys bergenin habarlady.
«Sailaý 2021 jyl. Azamattyq boryshymdy ótedim. Partiialarǵa sáttilik! Sailaýǵa kelińizder», - dedi ol.
Belgili ánshi Marjan Arapbaeva da saiasi naýqannan tys qalǵan joq.
«Men sailaýǵa baryp,óz tańdaýymmen daýys berip qaittym! Elimizdiń jarqyn bolashaǵy úshin, talmai qyzmet etip, naǵyz Otanymyzdyń patrioty bolaiyq!!!», - degen ánshi otandastaryn daýys berýge shaqyrdy.
Belgili akter, teatr basshysy Ádil Ahmetov te azamattyq boryshyn ótegenin jazdy.
«Búgin - memleketimiz úshin tarihi kún. Sailaýǵa baryp óz tańdaýymdy jasadym. Durys tańdaý jasaǵanyma senimdimin», - deidi akter.
Ánshi Alma Amanjolova Almatydaǵy sailaý ýchaskesinde bolǵanyn jariialady.
«Alataý aýdanynyń halqy sailaýǵa belsendi qatysýda. Men óz daýsymdy berdim. Bolashaǵymyz jarqyn bolsyn!», - dedi ol.
Ánshi Dosymjan Tańatarov Qazaqstannyń damýy úshin tańdaý jasaǵanyn jazdy.
«Eldiń amandyǵy men tynyshtyǵy úshin! Meniń tańdaýym turaqty Qazaqstan jáne údemeli damý! Qiyndyqty eńserip, jeńiske birge jetemiz!»,- dedi Dosymjan Tańatarov.
Belgili ánshi Serikbol Sailaýbek te daýys berý úshin sailaý ýchaskesine at basyn burǵan.
«Assalaýmaǵaleikúm, qazaǵym! Men daýys berdim. Elimiz aman jurtymyz tynysh bolsyn!»,- dep jazdy ánshi.
Aktrisa, ánshi Aigúl Imanbaeva da azamattyq belsendiligin tanytyp, sailaý ýchaskesine barǵan.
«Qaiyrly tań Qazaq eli! En dalada erkin ósken elimiz aman bolsyn. Men óz tańdaýymdy jasadym»,- deidi ol.
Aita ketý kerek, 10 qańtarda QR Parlamenti Májilisi men Máslihat depýtattaryn sailaý bastaldy.
Almatyda 507 sailaý ýchaskesi tańǵy 07:00-den bastap ashyldy. Daýys berý oryndary «QR Sailaý týraly» zańynyń, Ortalyq sailaý komissiiasynyń talaptaryna sai keledi.
507 ýchaskede 2535 meditsinalyq qyzmetker: 1014 dáriger, 1521 medbike jumys isteidi. Odan bólek keibir sailaý ýchaskeleriniń janynda jedel járdem kezekshilik etedi.
Sailaýshylar maskamen kelýge mindetteledi. Eger joq bolsa olarǵa kireberiste maska beriledi. Eger onyń dene qyzýy joǵary bolsa, daýys berýge tyiym salynady.
Daýys berýshi óz ýchaskesin 221-10-01 koll ortalyǵy arqyly tegin bile alady nemese @sailau_almaty Telegram-bot kómegimen, sondai-aq «Open Almaty» servis ortalyǵynda jáne service.almaty.kz saitynan bile alady.
Májilis sailaýyna 5 saiasi partiia túsip jatyr:
«Aýyl» halyqtyq demokratiialyq partiiasy; «Nur Otan» partiiasy; «ADAL» saiasi partiiasy; «Aq jol» Qazaqstan demokratiialyq partiiasy; Qazaqstan halyq partiiasy. Bul partiialar ár deńgeidegi Máslihat depýtattyǵyna da óz úmitkerlerin shyǵardy.
