Foto: the-steppe.com
Tanymal qazaqstandyq mýzykant, talantty ánshi, ári reper Darkhan Juzz (shyn esimi – Darhan Júnisbekov) qaitys boldy. Bul aqparatty QR Syrtqy ister ministrligi rastady.
"Tailand politsiiasynyń aqparaty boiynsha, 24 aqpanda Phýket aralynda Qazaqstan azamaty Darhan Júnisbekov qaitys boldy. Ol jalǵa alǵan mopedimen jol apatyna túsken. Konsýl marqumnyń týystarymen bailanysta. Máiitti Qazaqstanǵa jiberý úshin qajetti qujattardy resimdeý boiynsha jumys júrgizilip jatyr", - deidi SIM resmi ókili Aibek Smadiiarov.
Daryndy jastyń ómirden ozýyna bailanysty Memlekettik keńesshi Erlan Qarin da kóńil aityp, jelide jazba qaldyrdy.
«Qaraly habar estigende tóbemizden jai túskendei boldyq. Daryndy ánshi Darkhan Juzz (Darhan Júnisbekov) ómirden ótipti. Darhan qazirgi zamanǵy qazaq mýzykasynyń jarqyn ókili edi. Jarqyrap janyp kele jatqan juldyzdyń mezgilsiz aǵyp túskeni qabyrǵamyzdy qaiystyrdy. Eline bergeninen bereri kóp, qazaq mýzykasyn damytýǵa úlken úles qosatyn azamat bolatyn. Amal neshik, ajal ony aramyzdan erte alyp ketti. Aldyń jaryq, topyraǵyń torqa bolsyn, Darhan! Seniń jarqyn beineń ónerińdi qadirleitin jurttyń júreginde máńgi saqtalady!», - dep jazdy ol Instagram paraqshasynda.
Mýzykanttyń Instagram-daǵy resmi paraqshasynda sońǵy jazba byltyr 17 qyrkúiekte jariialanǵan.
Darkhan Juzz (Darhan Júnisbekov) 1991 jyly 9 tamyzda Almatyda dúniege kelgen. Ol rep oryndaýshy, birqatar ánniń avtory jáne saýnd-prodiýser edi.
Darhan án shyǵarýmen 14 jasynan bastap ainalysqan. Onyń shyǵarmashylyǵy klassikalyq trepty, akýstikalyq gitarany jáne sezimtal lirikany biriktirdi.
