Foto ashyq derekkózden alyndy
Tanymal kompozitor, QR mádeniet qairatkeri, «Qurmet» ordeniniń iegeri Arman Dúisenov dúnieden ozdy. Bul aqparatty Mádeniet jáne sport ministrligi rastady.
Sondai-aq áleýmettik jelilerde elimizge belgili mádeniet jáne óner qairatkerleri marqumnyń artynda qalǵan otbasyna kóńil aityp jatyr.
Arman Dúisenov 1974 jyly Batys Qazaqstan oblysy Oral qalasynda týǵan.
QazAqparat agenttiginiń jazýynsha, ol 1997 jyly Qurmanǵazy atyndaǵy Qazaq ulttyq konservatoriiasyn támamdaǵannan keiin Halyq ártisi Raiymbek Seitmetov negizin qalaǵan «Óner» fakýltetiniń Mýzyka jáne oryndaýshylyq óner kafedrasynda sabaq beredi. Osy aralyqta respýblikalyq jáne halyqaralyq konkýrstarda top jarǵan jas talantty ánshiler men akterlerdiń tutas býynyn tárbielep shyǵarǵan.
Óner qairatkeriniń ózi de birneshe márte respýblikalyq án baiqaýlarynda jeńimpaz atanyp, 50-ge jýyq elde gastroldik saparmen bolǵan.
Sonymen qatar kompozitor «Habar» jáne «El arna «telearnalarynda «Aibyn», «Dostarhana», «Tapqyr dostar», «Dýdar-ai» jáne «Habar-stars» baǵdarlamalaryn tizgindedi.
Arman Dúisenov kópshiliktiń súispenshiligine ainalǵan birneshe kinotýyndyǵa mýzyka jazǵan. Buǵan qosa, onyń «Kezder-ai», «Arman», «Seni saǵyndym», «Jan qyzym», «Aýyldaǵy qyz» siiaqty týyndylary halyq arasynda keń taralǵan.
QR Mádeniet qairatkeri Arman Dúisenov ómiriniń sońǵy jyldary «Qazaq áýenderi» AQ «Gúlder» filialynyń direktory qyzmetin atqarǵan.
Osy oraida, Ult portalynyń ujymy qazaq jurtyna qadirli bolǵan kompozitordyń mezgilsiz dúnieden ozýyna bailanysty onyń otbasy men týǵan-týystaryna qaiǵyryp kóńil aitady.
Marqumnyń jatqan jeri jaily, topyraǵy torqa bolsyn. Peiishte nury shalqyp, Jaratqan artyndaǵy urpaǵyna uzaq ǵumyr bersin!
