Túrkistanda politseiler jasyryn tsehty anyqtap, odan 8 tonnadan astam kir jýǵysh zat tárkiledi, - dep habarlaidy "Ult aqparat" Polisia.kz basylymyna silteme jasap.
Túrkistan oblysy PD Uiymdasqan qylmysqa qarsy kúres basqarmasynyń qyzmetkerleri jedel-izdestirý is-sharalary barysynda Túrkistan qalasynda kontrafaktilik ónim daiyndaý jasyryn tsehyn anyqtap, onyń qyzmetine tosqaýyl qoidy.
Bul jait QR QK-niń 222-baby 1-bóligi (Taýar belgisin, qyzmet kórsetý belgisin, firmalyq ataýyn, geografiialyq kórsetkishin jáne taýar shyǵarylǵan jerdiń ataýyn zańsyz paidalaný) boiynsha Túrkistan QPB-ǵa tirkeýge alyndy.
Nátijesinde politseiler tórt er azamatty anyqtady. Onyń biri - kontrafaktilik ónim daiyndaýdy uiymdastyrýshy, iaǵni Túrkistan qalasynyń turǵyny bolsa, qalǵan ekeýi de - Túrkistan qalasynyń turǵyndary jáne bir Ózbekstan azamaty.
Jedel ýákilder atalǵan úidiń aýlasyn tintý kezinde 40 keli qaptarǵa oralǵan untaq zatty tapty, olardyń sany shamamen 200 dana bolǵan.
Sonymen qatar, elektrondy tarazylar, tyǵyzdaǵysh mashinalar jáne basqa da zattai dáleldemeler tárkilendi. Untaqty zattyń jalpy salmaǵy segiz tonnadan asty. Atalǵan er azamattar qaptaǵy untaqtardy polietilen paketterge shamalap salyp, iaǵni "Ariel", "Mif", "Tide" jáne "Persil" siiaqty kir jýǵysh zattardyń belgili brendterin qoldan jasaǵan. Politseiler jinaqtalǵan materialdardy sheshim qabyldaý úshin Túrkistan oblysy boiynsha Ekonomikalyq tergeý departamentine joldady.
