Sýret: Otyrar.kz
Almatyda sot sheshimimen tanymal bloger kámeletke tolmaǵan balasyna 30 AEK turaqty somada aliment tóleýge mindetteldi, dep habarlaidy "Ult aqparat" Almaty sottaryna silteme jasap.
Is Almaty qalasynyń kámeletke tolmaǵandar isteri jónindegi mamandandyrylǵan aýdanaralyq sotynda qaralǵan.
S. balanyń ákesi J.-nyń tanymal bloger bola tura, basqa da tabystary bolsa da, aliment tólemeitindigi týraly ýáj keltirip, balaǵa 20 000 teńge mólsherinde aqshalai somada aliment óndirý týraly talap qoiýmen júgingen. Sot anyqtaǵandai, buryn sot sheshimimen J.-nyń kámeletke tolmaǵan balasy A-ǵa qatysty áke bolýy belgilenip, onyń tapqan tabysynyń jáne (ózge) tabysynyń tórtten bir bóligi mólsherinde aliment óndirilgen.
Sottyń habarlamasyna súiensek, is barysynda balanyń ákesi J., jalaqysy 70 000 teńge kólemin quraityny týraly anyqtama usynǵan. Osy oraida bank anyqtamalarynan J.-nyń esepshotynda qomaqty qarajaty bar ekeni, qymbat zat satyp alatyny, týrizm jáne demalys maqsatynda respýblikadan tys jerlerge jii shyǵatyny anyqtalǵan.
"Neke (erli-zaiyptylyq) jáne otbasy týraly" Kodekstiń 141-babyna sáikes ata-analar arasynda kámeletke tolmaǵan balalar úshin aliment tóleý týraly kelisim bolmaǵan jaǵdaida jáne aliment óndirip alǵanǵa barabar jaǵdailarda ata-ananyń tabysy jáne (nemese) ózge de tabysy múmkin bolmasa, qiyn nemese taraptardyń biriniń múddelerin eleýli túrde buzsa, sot ai saiyn belgilengen aqshalai somada nemese bir mezgilde óndirip alynatyn aliment mólsherin anyqtaýǵa quqyly.
Mundai jaǵdailarǵa turaqty emes, ózgermeli tabysy jáne (nemese) ózge de kirisi bar ata-anadan nemese ata-ana jalaqyny jáne (nemese) ózge de kiristi tolyq nemese ishinara zattai alatyn ata-analardan aliment óndirip alý jatady.
"Sot is boiynsha anyqtalǵan mán-jailardy, onyń ishinde jaýapkerdiń basqa da kiristerin eskere kele, balanyń múddesin eskere otyryp, jaýapker J.-dan talap qoiýshy S.-nyń paidasyna 30 AEK turaqty somada aliment óndirý týraly sheshim qabyldady", - delingen habarlamada.
Sot sheshimi zańdy kúshine engen joq.
