Almatyda belgili akter, telejúrgizýshi Rahman Omarovtyń birinshi áieli Gúlderaiym Omarova kisi qolynan qaza tapty. Áiel páteraqysyn alýǵa barǵan kezde ony páter jaldap turǵan áielder pyshaqtap tastaǵan, dep habarlaidy QazAqparat tilshisi.
Qaiǵyly oqiǵa týraly otbasynyń ónerdegi joldasy Qaragóz Súleimenova Instagramdaǵy paraqshasynda jariialady.
«Janymyz qulazyp, júregimiz jylap otyr. Orny tolmas qaza. Dúisenbi kúni Gúlderaiym Omarovadan aiyrylyp qaldyq. Tapa-tal túste kisi qolynan qaza tapty. Zamannyń aiýandalǵany sonshalyq, kvartiranttarynan aqsha alýǵa barǵanda 30-dyń tóńiregindegi eki áiel pyshaqtap óltirgen. Alla jazalaryn bersin. Minezge bai, kópshil, tárbieli, qazaqtyń danagói qyzdarynyń biri edi. Óte kishipeiil, asa inabatty, jaidary júzi kóńilimizden ketpeidi», - dedi Qaragóz Súleimenova.
Marqumnyń denesi keshe jer qoinyna tapsyryldy.
Aita ketý kerek, Gúlderaiym Omarovanyń artynda úsh uly qaldy.
«Tuńǵyshtarynyń atyn Rahman ekeýi Doshan dep qoiyp edi. Ol bala Chehiiada ekinshi kýrsty aiaqtady. Ekinshi uly mektep bitirdi. Kenjesi 8 jasta. Rahman Omar ekeýiniń ómir joldary kóz aldymyzda ótti. Ómir boiy eriniń abyroiyn asqaqtatyp, azamattaryna talmai tárbie berdi. Búgin jer qoinyna tapsyrdyq. Allanyń qalaýy bolar, ortamyzdan mezgilsiz ketti. Artynda qalǵan uldaryna anasynyń kórmegen qyzyǵyn, jasamaǵan jasyn bersin. Allanyń buiryǵyna amal joq. Jatqan jeri jaily, topyraǵy torqa bolsyn. Jany jánatta bolǵai. Aldy peiish, arty kenish bolsyn. Allam urpaqtaryna ómir bersin. Máńgi júregimdesiń», - dedi Qaragóz Súleimenova.
Ázirge qalalyq IID atalǵan derekke bailanysty túsinikteme bermedi. «QazAqparat» atalǵan oqiǵaǵa bailanysty qalalyq IID-ge saýal joldady.
