الماتىدا بەلگٸلٸ اكتەر, تەلەجٷرگٸزۋشٸ راحمان وماروۆتىڭ بٸرٸنشٸ ەيەلٸ گٷلدەرايىم وماروۆا كٸسٸ قولىنان قازا تاپتى. ەيەل پەتەراقىسىن الۋعا بارعان كەزدە ونى پەتەر جالداپ تۇرعان ەيەلدەر پىشاقتاپ تاستاعان, دەپ حابارلايدى قازاقپارات تٸلشٸسٸ.
قايعىلى وقيعا تۋرالى وتباسىنىڭ ٶنەردەگٸ جولداسى قاراگٶز سٷلەيمەنوۆا ينستاگرامداعى پاراقشاسىندا جارييالادى.
«جانىمىز قۇلازىپ, جٷرەگٸمٸز جىلاپ وتىر. ورنى تولماس قازا. دٷيسەنبٸ كٷنٸ گٷلدەرايىم وماروۆادان ايىرىلىپ قالدىق. تاپا-تال تٷستە كٸسٸ قولىنان قازا تاپتى. زاماننىڭ ايۋاندالعانى سونشالىق, كۆارتيرانتتارىنان اقشا الۋعا بارعاندا 30-دىڭ تٶڭٸرەگٸندەگٸ ەكٸ ەيەل پىشاقتاپ ٶلتٸرگەن. اللا جازالارىن بەرسٸن. مٸنەزگە باي, كٶپشٸل, تەربيەلٸ, قازاقتىڭ داناگٶي قىزدارىنىڭ بٸرٸ ەدٸ. ٶتە كٸشٸپەيٸل, اسا يناباتتى, جايدارى جٷزٸ كٶڭٸلٸمٸزدەن كەتپەيدٸ», - دەدٸ قاراگٶز سٷلەيمەنوۆا.
مارقۇمنىڭ دەنەسٸ كەشە جەر قوينىنا تاپسىرىلدى.
ايتا كەتۋ كەرەك, گٷلدەرايىم وماروۆانىڭ ارتىندا ٷش ۇلى قالدى.
«تۇڭعىشتارىنىڭ اتىن راحمان ەكەۋٸ دوسحان دەپ قويىپ ەدٸ. ول بالا چەحييادا ەكٸنشٸ كۋرستى اياقتادى. ەكٸنشٸ ۇلى مەكتەپ بٸتٸردٸ. كەنجەسٸ 8 جاستا. راحمان ومار ەكەۋٸنٸڭ ٶمٸر جولدارى كٶز الدىمىزدا ٶتتٸ. ٶمٸر بويى ەرٸنٸڭ ابىرويىن اسقاقتاتىپ, ازاماتتارىنا تالماي تەربيە بەردٸ. بٷگٸن جەر قوينىنا تاپسىردىق. اللانىڭ قالاۋى بولار, ورتامىزدان مەزگٸلسٸز كەتتٸ. ارتىندا قالعان ۇلدارىنا اناسىنىڭ كٶرمەگەن قىزىعىن, جاساماعان جاسىن بەرسٸن. اللانىڭ بۇيرىعىنا امال جوق. جاتقان جەرٸ جايلى, توپىراعى تورقا بولسىن. جانى جەناتتا بولعاي. الدى پەيٸش, ارتى كەنٸش بولسىن. اللام ۇرپاقتارىنا ٶمٸر بەرسٸن. مەڭگٸ جٷرەگٸمدەسٸڭ», - دەدٸ قاراگٶز سٷلەيمەنوۆا.
ەزٸرگە قالالىق ٸٸد اتالعان دەرەككە بايلانىستى تٷسٸنٸكتەمە بەرمەدٸ. «قازاقپارات» اتالعان وقيعاعا بايلانىستى قالالىق ٸٸد-گە ساۋال جولدادى.
