Foto: Pexels.com
Qazaqstan Respýblikasynyń Densaýlyq saqtaý ministrligi ambýlatoriialyq dári-dármekpen qamtamasyz etýdiń jańa tetigin – dáriler úshin birlesip tóleý júiesin iske qosýda. Pilottyq joba 2025 jyly Astana qalasynda bastalyp, qoldanystaǵy tegin dári-dármekpen qamtamasyz etý júiesin tolyqtyratyn bolady, dep habarlaidy Ult.kz.
Jańa tetik qoldanystaǵy tegin retsept arqyly dári alý tártibin ózgertpeidi. Azamattar burynǵydai kepildendirilgen tegin meditsinalyq kómek kólemi sheńberinde dári-dármekterin aqysyz ala alady.
Sonymen qatar patsientterge birlesip tóleý júiesine qatysýshy dárihanalardan basqa preparatty tańdaý múmkindigi beriledi. Bul rette tegin dári alý quqyǵy saqtalady.
Birlesip tóleý tetigi patsientterge óz betinshe sheshim qabyldaýǵa múmkindik beredi: dárini tegin alý nemese zamanaýi preparatty tańdap, onyń qunynyń bir bóligin óz esebinen tóleý.
Tólem mólsheri – halyqaralyq patenttelmegen ataýy boiynsha belgilengen shekti baǵa men tańdalǵan preparat qunynyń aiyrmashylyǵy sheginde júrgiziledi.
Birinshi kezeńde tetik «arteriialyq gipertenziia» aýrýy boiynsha engiziledi. 2024 jyly ambýlatoriialyq dári-dármekpen qamtamasyz etý aiasynda 3,3 million patsient, onyń ishinde 1,2 milliony arteriialyq gipertenziiamen aýyratyndar dári alǵan.
Tólem «eGov» mobildi qosymshasyndaǵy «Áleýmettik ámiian» servisi arqyly, QR-kody bar elektrondyq retsept negizinde júzege asyrylady. Pilottyq jobany qarjylandyrý ambýlatoriialyq dári-dármekpen qamtamasyz etýge arnalǵan Mindetti áleýmettik meditsinalyq saqtandyrý qorynyń bekitilgen biýdjeti sheginde júrgiziledi.
"Birlesip tóleý tetigin engizý – emdelý nátijeliligin jaqsartýǵa jáne aýrý asqynýlaryn, múgedektik pen ólim-jitimdi azaitýǵa baǵyttalǵan.
Birlesip tóleý júiesi - múmkindikterdi shektemeidi, kerisinshe keńeitedi, patsientke tańdaý erkindigin berip, dári-dármekpen qamtamasyz etý júiesiniń ikemdiligi men ashyqtyǵyn arttyrady", - deidi ministrlik.
