QR
Eńbek jáne halyqty áleýmettik qorǵaý ministri Tamara Dúisenova Túrkistanǵa
jumys sapary barysynda «Turkestan Textile» BK» JShS tigin fabrikasynyń eńbek
ujymymen kezdesti.
Ministr Memleket basshysynyń Qazaqstan halqyna Joldaýynda aitylǵan tapsyrmalarynyń iske asyrylý barysy jáne QR Áleýmettik kodeksiniń jobasy týraly aityp berdi.
Sóz basynda Tamara Dúisenova Áleýmettik kodekstiń jobasyn ázirleý barysynda sarapshylar men azamattyq qoǵamdastyqtan 1000-nan astam usynys túskenin, 50-den astam zańdar men 200 zańǵa táýeldi aktiler zerdelengenin atap ótti. Áleýmettik kodekstiń qabyldanýyna orai 80-nen astam zańǵa ózgerister engiziledi jáne burynǵy 10 zań kúshin joiady.
«Áleýmettik kodeks áleýmettik táýekelder týyndaǵan kezde memleket tarapynan kómekti qamtamasyz ete otyryp, azamattardy ómir boiy súiemeldeitin bolady. Bul rette azamattardyń jekelegen osal sanattaryn qoldaýdan qazaqstandyq otbasylardy nyǵaitý men damytý úshin bazalyq jaǵdailar jasaýǵa kóshý júzege asyrylatyn bolady», – dedi Eńbekmininiń basshysy.
Ministr Memleket basshysynyń tapsyrmalary men Áleýmettik kodeks jobasyn iske asyrý aiasynda:
- Otbasynyń tsifrlyq kartasy arqyly proaktivti formatta belgilengen áleýmettik memlekettik kepildikter berý arqyly otbasylardyń áleýmettik táýekelderiniń aldyn alý júiesin qalyptastyrý;
- jumys kúshiniń kásibi daǵdylaryn kúsheitýdi, ikemdi jumyspen qamtýdyń barlyq túrlerin zańnamalyq bekitý men retteýdi, tehnologiialar men bilim transferti úshin bilikti kadrlardy tartýdy, ishki kóshi-qondy retteýdi, jumyspen qamtý ortalyqtaryn mansap ortalyqtaryna ainaldyrýdy jáne kórsetiletin qyzmetterdi aýqymdy tsifrlandyrýdy kózdeitin jumyspen qamtý salasynda jańa saiasat júrgizý;
- biýdjetten tólenetin zeinetaqy tólemderiniń mólsherin ulǵaitý, memlekettiń, jumys berýshiniń jáne qyzmetkerdiń qatysýymen kóp deńgeili zeinetaqy júiesin qurý esebinen azamattardy zeinetaqymen qamsyzdandyrýdy jetildirý;
- memlekettik járdemaqy men Memlekettik áleýmettik saqtandyrý qorynan bala kútimi boiynsha áleýmettik tólemdi tóleý merzimin bir jarym jasqa deiin uzartý, nagradtalǵan analarǵa beriletin járdemaqy mólsherin ulǵaitý, Ulttyq qordyń jyl saiynǵy investitsiialyq tabysynyń 50%-yn balalar 18 jasqa tolǵanǵa deiin arnaiy jinaqtaý shottaryna aýdarymdar jasaý jolymen balalary bar otbasylardy qoldaý sharalaryn kúsheitý;
- memlekettik-jekemenshik áriptestik tetikteri, aýqymdy tsifrlandyrý jáne adami faktordy tómendetý arqyly memlekettik áleýmettik qyzmetterdiń qoljetimdiligin keńeitý esebinen áleýmettik qyzmet kórsetý júiesin jańǵyrtý (Áleýmettik qyzmetter portaly, meditsinalyq-áleýmettik saraptamany syrttai júrgizý) qarastyrylǵanyn atap ótti.
