Astanada Qazaqstannyń eńbek sińirgen qairatkeri, tanymal dizainer Haným Aidashtyń "Qazaq ulttyq kiimderiniń qazirgi zaman mádenietine yqpaly" atty monografiiasy tanystyryldy. Mádeni sharaǵa jinalǵan otandyq estrada juldyzdary ulttyq kiim men áshekeilerdiń ánshiler úshin mańyzyna toqtalyp, qazaqtyń dástúrli kiimin nasihattaý joldaryn aitty, dep habarlaidy Sputnik Qazaqstan tilshisi.
Estrada juldyzy Jeńis Ysqaqovanyń aitýynsha, qazaqtyń ulttyq kiimi men áshekeilerin ánshi, sángerler arqyly nasihattap, óskeleń urpaqqa jetkizýimiz kerek.
"Biz óner adamy retinde sahna arqyly dástúrli kiimderimizdi, oiý-órnekterimizdi nasihattaýymyz kerek. Qazir qarap otyrsańyz, álemdik modadaǵy Versace, Gucci, Chanel brendterin ózderiniń erekshe órnegi, elementteri arqyly bári tanidy, biledi. Biz de qazaqtyń órnekterin "qazaq modasy" dep kórsetýimiz kerek. Óner adamdary bul úshin ne istei alady? Búkil halyq, bolashaq urpaq, jastar bizdiń sahnadaǵy kiimderimizge qarap elikteýi múmkin. Sondyqtan kóilekterdi taza qazaqsha qylyp emes, zamanaýi, ádemi etip, oiý-órnekti, ulttyq fragmenttermen árlep, tigý qajet. Kezinde osydan 25-27 jyl buryn Qazaqstanda "Symbat" degen bir-aq sán úii bolatyn. Sol "Symbatqa" men eń alǵash moda kórsetip shyqqan edim. Sol kezden bastap, men qandai kiim tikkizsem de, ulttyq elementterdi, ulttyq naqyshty qosamyn. Sondyqtan biz ánshiler arqyly, sán álemindegi dizainerler arqyly muny bolashaq urpaqqa jetkizýimiz kerek. Qazaqtyń dástúrli kiimi men oiý-órnekterin zamanaýi qylyp tikse, álemdik brendter jolda qalady", — deidi ánshi.
Ysqaqova qazaqtyń dizainerlerine nasihat jetpei júrgenin aitty.
"Eger bizdiń dizainerlerdi jaqsylap nasihattasa, "aiǵailap turǵan" álemdik brendter oinamai qalady. Men ózim shetelge gastrolderge shyqqanda, sheteldikter qazaqy stilde tigilgen kóilegime qarap esterinen tanyp, tamsanyp jatady. Bir janym ashityny – bizdiń oiýlardy batystyń dizainerleri ózderine iemdenip alǵan", — dep qynjyldy estrada juldyzy.
Al ánshi Tamara Asardyń aitýynsha, qazaqtyń ulttyq kiimin Dimash Qudaibergen arqyly da nasihattap, álemge tanytýǵa bolady.
"Men únemi sahnada qazaqtyń dástúrli kiimin kiip júremin. Meniń árbir kostiýmim qazaq halqynyń tarihynan syr shertedi. Men ózim de kiim tigemin, sondyqtan qazaq halqynyń etnotarihyn, ár oiý-órnektiń tarihyn jaqsy bilemin. Bir kóńilim tolmaityny, qazir aiaq astynda jatatyn kiiz ben syrmaqtyń oiý-órnekteri kiim-keshekterde órnektelip júr. Dizainerler sony eskerse eken deimin. Al álemdik naryqqa shyǵatyn dizainerge memleket te qoldaý kórsetkeni durys. Nemese ulttyq brendti nasihattaý úshin bir kontseptsiia ázirleý qajet. Dimash Qudaibergen arqyly da qazaqtyń oiý-órnegin, ulttyq kiimin álemge tanytyp, ulttyq brendti ilgeriletýge bolady", — dep túiindedi ánshi.
