Aýǵan-tájik shekarasyndaǵy Sherhan-Bandar aimaǵyn basyp alǵan tálipter Qundyz qalasyna qarai oiysa bastaǵan. AQSh pen NATO áskeri elden shyǵarylyp jatqan tusta Taliban basqynshylyqty údetip, Aýǵanstandaǵy kóp jerlerge baqylaý ornata bastaǵan.
23 mamyrda Kongreste sóilegen shtab jetekshileriniń birikken komitetiniń tóraǵasy Mark Milli Aýǵanstanda 419 aýdan ortalyǵynyń 81-i tálipter baqylaýynda ekenin aitty. Biraq Millidiń aitýynsha, basyp alynǵan aýmaqtyń 60-y AQSh áskerin alyp ketetinin málimdemei turyp tálipter qolyna ótken.
22 maýsymda Taliban tájik shekarasyndaǵy negizgi aýmaqty baqylaýyna alǵan edi. 23 mamyrda Taliban soǵan qaramastan shekarada saýda jalǵasa beredi dep málimdedi. Aqparatqa qaraǵanda, shekara beketinen kún saiyn myń shaqty kólik ótedi.
Tálipter Qundyz provintsiiasynyń ortalyǵy Qundyz qalasynyń ońtústiginen shamamen 50 shaqyrym jerden qalany jan-jaqtan qorshai bastaǵan. Turǵyndar soǵystyń qyzý júrip jatqanyn, jaryq jáne ózge de infraqurylym júiesinde aqaý týyndaǵanyn habarlady.
Tálipterdiń ókili Mýdjahidtiń sózinshe, sodyrlarǵa qalaǵa kirmeýge buiryq berilgen. Taliban jetekshileri bul provintsiiadan AQSh kúshteriniń tolyq shyqqanyn kútpek.
Al Tájikstan biligi 23 maýsymda aýǵan-tájik shekarasynda qaqtyǵystyń tynshymaǵanyn habarlady. Bir kún buryn táliptermen soǵysyp, sheginýge májbúr bolǵan aýǵan úkimetiniń áskeri tájik jaǵyna ótip ketken edi.
"Birneshe saǵatqa sozylǵan atystan keiin shabýylǵa tótep bere almai aýǵan úkimeti kúshteriniń 134 sarbazy "Paianj" beketi arqyly Tájikstannyń aimaǵyna sheginýge májbúr bolǵan" dedi 22 maýsymda Tájikstan ulttyq qaýipsizdik komitetiniń óklideri.
Tájik shekarashylary "gýmanizm men dostyq týraly kelisim sharttaryna súiene otyryp, aýǵan sarbazdaryna tájik jerine kedergisiz ótýine ruqsat bergen".
Málimetke qaraǵanda, shekaraǵa jaqyn jerdegi qaqtyǵysta aýǵan áskeriniń 100 shaqty sarbazy oqqa ushyp, tutqynǵa alynǵan.
