«Taliban» (Joǵarǵy sot sheshimine sáikes, Qazaqstanda qozǵalysqa tyiym salynǵan) Aýǵanstandaǵy jańa úkimettiń quramyn jariialady, dep habarlaidy QazAqparat Euronews-ke silteme jasap.
«Aýǵanstan Islam emiratynyń» premeri mindetin atqarýshy qyzmetine molla Mohammad Hasan Ahýnd taǵaiyndaldy. Uiym ózin osylai atai bastady. Ol tálipterdiń «Shýra» joǵarǵy keńesiniń jetekshisi bolǵan. Mohammad Qandaǵarda dúniege kelgen. Atalmysh áskeri uiym da sol qalada uiymdastyrylǵan.
Premer-ministrdiń orynbasary Abdýl Gani Baradar boldy. Ol toptyń uiymdastyrýshysynyń biri, qýǵynda júrgende Qatarda Taliban úkimetin basqarǵan. Ekinshi orynbasar - molla Abdýl Salam Hanafi. Ol Dohada ótken kelissózderde tálipter delegatsiiasynyń ekinshi tulǵasy boldy.
Molla Abdýl Hak Vasik barlaý ministrligin basqarady. Ol buǵan deiin tálipterdiń saiasi basqarmasynda Eýropa bólimine jetekshilik etken.
Aýǵanstannyń Syrtqy ister ministrligin qozǵalys kósemderiniń biri molla Amir Han Mottaki basqarady.
IIM basshysy bolyp qozǵalys kósemderiniń biri Siradjýddin Hakkanidiń uly taǵaiyndaldy. Ol uiymnyń eń radikaldy qanaty «Hakkani jelisine» jetekshilik etken.
Aýǵanstannyń qorǵanys ministri «Talibandy» qurýshynyń biri molla Mohammad Iakýbtyń balasy boldy.
Qarjy ministri bolyp molla Eiadýlla Badri taǵaiyndaldy. Ekonomika ministrligin Mohammad Hanif basqarady. Ortalyq banktiń basshysy - molla Mohammad Idris.
Bilim ministri - sheih Mavlavi Nýrýlla Mýnir. Shekara jáne taipalar ministri— Nýrýlla Nýri. Tabiǵi resýrstar ministri — molla Mohammed Isa Ahýnd. Sý jáne elektrmen jabdyqtaý is boiynsha ministr — molla Abdýl Latif Mansýr. Aýyl sharýashylyǵy ministri— molla Abdýl Manan Omari.
Mádeniet jáne aqparat ministrligine Zabihýlla Mýdjahid jetekshilik etedi, ol tálipterdiń resmi ókili bolǵan.
