Búgin Qostanaidyń №2 qalalyq sotynda «Tulpar-Talgo» poiyzynda aqtóbelik boijetkendi zorlaǵan eki jolserikke úkim oqyldy, dep habarlaidy "Ult aqparat" oblystyq sottyń baspasóz qyzmetine silteme jasap.
«Sot úkimimen poiyz jolserikteri Qolqanat Qurmaniiazov pen Jetes Úmbetáliev QR QK 120-babymen 5 jylǵa bas bostandyǵynan aiyryldy. Olar jazany qylmystyq atqarý júiesiniń qaýipsizdik deńgeii ortasha mekemesinde óteidi», - deidi vedomstvonyń baspasóz qyzmetindegiler.
Aita keteiik, osy jyldyń 26 shildesi kúni Jetes Úmbetáliev pen Qolqanat Qurmaniiazov sot úkimimen QR QK 120-babynyń 1-bóligine sáikes 2 jyl 6 ai merzimge bas bostandyǵynan aiyrylǵan.
Eske salsaq, «NeMolchiKZ» qoǵamdyq qorynyń basshysy Dina Smailovanyń Facebook paraqshasynda jazýynsha, 26 qyrkúiek kúni keshki saǵat 10-dar shamasynda boijetken «Talgo» poiyzynyń kýpesine otyrady. Kýpe ishinde bir er adam bolǵan. Zattaryn qoiyp, poiyz meiramhanasynyń ashanasynan tamaqtanyp kelgen kezinde kýpe ishinde arnaiy forma kimegen jolserik otyrady. Ol áýelgi er adamdy basqa kýpege aýystyryp jibergenin aitady. Qyz uiqysy kelgenin túsindirip, jolserikten kýpeden shyǵýyn ótinedi. Syra iship otyrǵan jolserik tek jarty saǵattan soń shyǵyp ketken. Alaida tańǵy saǵat 04:00 shamasynda jolserik boijetken jatqan kýpege óz kilti arqyly ashyp kiredi. Munan soń aram oiyn iske asyrady. Izinshe ekinshi jolserik te kelip, boijetkendi zorlaǵan.
