Semeiden ketken jyly jazýshy qatty aýyryp qalǵan. Árine, bireýler onyń tórtinshi áielinen ajyrasynan kórgen. Aldyńǵy úsheýi de jaman adamdar emes edi. Bar kúná rasynda jazýshynyń minezinen edi. Tún jarymda úiiniń esigin teýip ashyp kafe-restoran, biliard klýbyn aralap ketetin edi. Tańerteń qonaq úidiń bir bólmesinde búk túsip jatatyn edi. Jazýshynyń bir ǵana tórt áieline jasaǵan jaqsylyǵy - ý-shýsyz dúnieni bólispei, urys-kerissiz qai-qaisysyna baspanasyn tastap ketetindigi. Astananyń ortalyǵynan bir bólme, Talǵardan bir dacha, alyp jaz boiy sonda bolatyn. Óndirip-aq jazdy, shetelge tanylǵan boida qalamaqy qaita bite bastady. Ombydan kele jatyp Pavlodarǵa toqtaǵan bir jyly Ertistiń jaǵasyndaǵy jańadan salynǵan úiden bir bólmeli páter satyp alyp, ishin bir ai jónge keltiredi. Eń sońǵy úlgidegi liftisi onynshy qabatqa qas-qaǵymda jetkizedi. Ádettegindei billiard klýbyna barǵanynda júrek talmasyna ushyraidy. Kózin ashsa, bilegin ustap moiyldai qara kózderine jas kelip:
- Aǵa, qalaisyz? – degen sulý kelinshekti kórdi.
- Men qaidamyn? – degendi áreń aitty.
- Dárigerler sizdi aman qalyp qaldy ǵoi...
Qaitadan talyqsyp uiyqtap ketti. Bir ai aýrýhanada bolǵanynda janynan álgi sulý kelinshek qasynan ketpeitin. Ekeýi áńgimelesetin. Áńgimeniń arty aǵaiyndy qaryndastai jaqyndastyqqa ákelgen. Jazýshy oǵan baýyr basyp qalǵan. Bir kúni:
- Aǵa, ruqsat bolsa, kiimderińizdi tazalap jýyp ákeleiin, men jaqyn jerde jataqhanada turamyn.
- O ne degeniń, arnaiy jýatyn oryndar bar ǵoi.
- Mende kir jýǵysh mashina bar. Jaqynda kreditke alǵam, - dep uzyn kirpikterin qaǵa sóiledi sulý kelinshek.
- Aiechka, kúieý bala ne isteidi?
Kelinshek basyn shaiqady.
- Túsinikti... – dedi Jazýshy. – Jas adamsyń, jalǵyz bolma, ainalaiyn.
- Bir-aq adamdy súidim, aǵa. Ol keremet mýzykant edi, shirkin! – dep kúrsindi de: «Men sizdi úide kútemin, aǵa», - dedi.
- Aiia, sen eshteńege áýre bolmashy, ainalaiyn. Dárigerler meni erteń shyǵaratyn boldy. Bir jerden tústeneiik, qalasań.
- Tek restoran emes. Meniń jataqhanadaǵy bólmeme qonaqqa kelińiz.
- Áýre bop qaitesiń? Restoran bar emes pe bul qalada? – dep kúldi Jazýshy.
- Aǵa, siz meniń aǵamsyz. Menen týra on alty jas úlken ekensiz, - dedi medbike qyz. Men sizdiń «Ystyq kóldiń salqyny» degen povestińizdi oqydym. Nastoiashii pro liýbov qoi! Oi, podrýgalarym da oqyp jylady ǵoi bári!
Jazýshy tuńǵiyq kózderine qarap onyń aitqanynan qaitpaityn ekendigin bile qoidy.
- Erteń qai ýaqytta baraiyn?
- Túste anaý turǵan terektiń artyndaǵy podezdiń tórtinshi qabatynda turamyn. №31 bólme. Kútemin sizdi. Tushpara túiip qoiamyn. Sorpasyn unatatyn bolarsyz?!.
- Seniń qolyńnan ý ishsem de rizamyn!
- Oi, aǵashka, qoisańyzdarshy osyndailaryńyzdy!Jasyńyz 55-ke keldi. Uiat emes pe, ózińizden kóp jas kishi kelinshekke solai aita ma eken?!
- Túsindim, baramyn.
- Kak raz demalysym edi erteń.
Erteńinde aýrýhanadan qaǵazdaryn rettep, emhananyń basshysy Eldos Oralhanovichke alǵysyn aityp, dárigerlerge sýpermarketten ony-muny berip, artynsha Aiianyń jataqhanasyna keldi.
- Ooo, aǵa, qosh keldińiz! Tórletińiz!
Jazýshy kelinshekti birinshi ret kórgendei suqtana qarady. Qap-qara shashy iyǵyna tógilgen, aq tamaǵy búlkildep, qyp-qyzyl búldirgendei erinniń astynan marjandai aq tisteri tizilgen, keýdesindegi qos anary tepsinip tur, beli shyrkin úzilip keterdei, oqtaýdai aiaqtary, baltyry jup-jumyr eken. Áiel zatynan mol tájiribesi bar jazýshy kózqarasyn jasyrǵysy kelgendei tereze jaqqa qarap: «Máá, qar jaýyp ketipti ǵoi», - dedi.
- Ózińizdiń kúrtesheńizdi berińiz, ilip qoiaiyn, - dedi Aiia. Jazýshy jymiyp kúldi de, shaǵyn dastarhannyń tórine baryp otyrdy. Aldyna úlken kesemen kelgen dámmniń qosh iisi murnyn jaryp barady.
- Aǵa, dám ala otyryńyz.
Neshe kún dári-dármek ishken Jazýshy asqazanyna dámdi taǵam barǵan soń borsha-borsha terlemesi bar ma? Dál bir monshaǵa túskendei bolyp edi-aý. Aiianyń úiinen shyǵyp bara jatyp konvertke salynǵan eki myń dollar men jańa úiiniń ekinshi kiltin tastap ketti.
- Qaryndasym, meniń úiime bas-kóz bolarsyń. Jańa óziń kelisimińdi bergennen keiin solai dep aityp turmyn, - dep, bólmeden shyǵyp ketti.
Kelinshek aqyryn ǵana kúlip basyn izedi. Odan keiin jazýshy Novosibir, Máskeý, Mońǵoliia saparlaryna osy Pavlodar arqyly júrgende úiiniń taza bolyp turatynyna riza bolatyn. Tipti, shetelde júrgende Aiianyń telefonyna qońyraý shalyp:
- Gúlderdi sýardyń ba? Olar da sen siiaqty ádemi ǵoi! – dep jarqyldai kúletin.
Jazýshy búgin de Kerekýge kele jatyr. Aspannan túsip jer basqannan keiin Aiiaǵa telefon soqty:
- Men keldim, ainalaiyn! Restorannan tamaqtanaiyq.
- Joq, aǵa, men sizdiń úiińizge keldim. Et asyp jatyrmyn. Sarjaldyń qymyzyn alyp qoidym. Nikakoi restoran! Úiińizge kelińiz.
Máskeýden alǵan syi-siiapatyn usyndy kelinshekke. Viskidi jýrnal ústeliniń ústine qoidy. Jazýshy shydamady, bas sap aimalai bastady sulýdy.
- Aǵa, qoiyńyzshy!Bunyńyz ne? - dep daýysy álsirei bastady.
Jazýshynyń esine viagrany ishpegeni túse ketti de:
- Ainalaiyn, jýynyp kelesiń be? - dedi. Kelinshek únsiz basyn izep, vanna jaqqa ketti. Jazýshy tez-tez sómkesin aqtaryp dárisin iship úlgerdi. «Endi jarty saǵat ótse boldy» dedi ishtei. Sál keshigip oramalǵa oranǵan sulý kelinshek shyqty. Álde shampýn, álde óziniń tabiǵi «aromat» iisin sezdi Jazýshy. Bas sap kelinshekti súigisi kelip edi:
- Aǵa, siz de «kak tsivilizovannye liýdi» jýynyp kelińiz. Jazýshy vannaǵa kirip ketti. Shala-sharpy jýynyp atyp shyqsa, óz kózine ózi senbedi. Kelinshek apyl-ǵupyl kiinip jatyr eken.
- Ne boldy, ainalaiyn?
- Aǵa, ol tiri. Men sezgenmin... onyń tiri ekenin, - dedi kózi botalap.
- Kimniń?
Syrttan án estilip turǵan edi.
... Órtenip janym,
Súidim men seni.
Shyn syryńdy,
Túidim tumar ǵyp...
- Áne, áne, aǵa! Óz daýysymen, ol tiri... Men ony súiemin... sheksiz...
Jazýshy ne aitaryn bilmei sileiip ornynda turyp qalǵan kezde kelinshek úiden shyǵyp úlgerdi de, liftimen tómen túsip ketti.
Jazýshy ne kiinerin, ne kiinbesin bilmei terezeniń aldyna bardy. Án estilip turdy. Jazýshynyń kózi tereze jaqtaýyndaǵy altyn alqasyna tústi. Alqanyń ortasynda oiylǵan nota turǵan eken.
... Men sendei janym,
Kináli emespin.
Órtenip janym,
Súigenim úshin ...
Jaýyn astymen Aiia Ertiske qarai júgirip bara jatyr. «Bul kelinshektiń júregin jaýlaǵan kim?». Qolyna Aiianyń notaly altyn alqasyn ustap turyp kúrsindi Jazýshy.
Jaýap ornyna qyzyl tilin jalań etkizip naizaǵai oinady...
Talǵat Keńesbaev
Ult portaly
