Ulttyq qoǵamdyq senim keńesiniń kelesi otyrysyna naqty nátijemen kelý úshin qazir jumys isteýimiz kerek. Ulttyq keńes múshesi QR Prezidenti janyndaǵy Ortalyq kommýnikatsiialar qyzmetiniń basshysy Talǵat Qaliev búgingi otyrystan keiin osylai pikir bildirdi, dep habarlaidy QazAqparat.
«Búgin óte ózekti máseleler kóterildi. Barlyq jumys toby birdei belsendi jumys júrgizdi. Munyń aldyndaǵy jumys toptarynyń basqosýynda talqylaýlar, diskýssiialar óte qyzý ótken bolatyn. Kóptegen konsensýsqa daýys berý arqyly keldik. Máselen, biz sailaý týraly, partiia týraly zańǵa ózgeris engizý baǵytynda jumys júrgizbekpiz. Bári de partiiany tirkeý jumysyn jeńildetýdi maquldap otyr. Qol jinaý isinde tártip ornatý kerek. Sebebi, qazirgi tsifrlandyrý kezeńinde barlyǵynda ETsQ bar. Sol sekildi, bálkim, dál qazirgi ýaqytta aýdan ákimderin sailaý júiesine ótý kezeńi de kelip turǵandai. Óitkeni, olar qazirgi tańda halyqpen tikelei jumys júrgizip, biýdjetti baqylap otyr», - dedi Ulttyq keńestiń saiasi reforma júrgizý blogyndaǵy Talǵat Qaliev.
Onyń aitýynsha, BAQ týraly zańdy da liberalizatsiialaý kerek.
«Sóz bostandyǵyn shektep, BAQ-tyń damýyna kedergi keltirip turǵan tetikterdi joiǵymyz keledi. Bálkim, depýtattardyń qatysýymen belgili bir jaýapty ministrliktiń janynan qandai da bir jumys toby qurylýy múmkin. Iaǵni, ol jumys toby naqty biz ataǵan zańǵa ózgeris engizý jumystaryn talqylaidy. Bir sózben aitqanda, kelesi otyrysqa naqty bir nátijemen kelerlik jumys tyndyrylýy tiis», - dedi Talǵat Qaliev.
Eske sala ketsek, búgin elordada Ulttyq qoǵamdyq senim keńesiniń alǵashqy otyrysy ótti. Otyrysqa Qazaqstan Prezidenti Qasym-Jomart Toqaev qatysty.
