Aimaqtardaǵy problemalardyń sheshimin máslihattardan talap etý kerek. Sailaý qorytyndysy jaily «Qoldanbaly etnosaiasi zertteýler institýty» JShS direktory Talǵat Qaliev osylai dedi, dep habarlaidy QazAqparat.
«Keiingi ondaǵan jyldar boiy bizdiń elde saiasatty shetten tys ortalyqtandyrý protsesi júrdi. Álbette kimniń depýtat, kimniń ministr ekenin, olardyń qandai is tyndyryp júrgenin bilgenimizben, óńirlerde ne bolyp jatqanyn kóp zerttei bermeitin edik. Aimaqtarda qandai da bir rezonansty jaǵdai tirkelse, sondaǵy aimaqtyq elitanyń, kezekti majordyń kim ekenin bilip otyratynbyz. Al biz onda máslihattyń hatshysy kim, ol ne istep jatyr degen suraqtyń jaýabyn bilmeýshi edik. Ýnitarly memleket, halqynyń sany az, jeri úlken el retinde aimaqtarda naqty ne bolyp jatqanyn bilip otyrýymyz kerek bolatyn», - dedi Talǵat Qaliev elordada ótken «SAILAU-2021: Parlament sailaýynyń aldyn ala qorytyndylary» atty saraptamalyq talqylaýda.
Sarapshynyń aitýynsha qazaqstandyq saiasattyń aimaqtyq ólshemi júrgizilýi tiis.
«Biz azamattyq qoǵam týraly sóz qozǵaǵanda aimaqtyq saiasatty, jergilikti ózin-ózi basqarý, aimaqtardy tiimdi basqarý máselelerin esten shyǵaryp jatamyz. Biz eń birinshi kezekte Májiliske emes, máslihattarǵa júginýimiz kerek. Qandai da bir aýdanda nelikten joldyń jaiy nashar ekenin, qala sheti nelikten damymai jatqanyn biz solardan suraýymyz kerek. Munyń bári jergilikti atqarýshy organdar men máslihattarǵa joldanatyn suraqtar, sebebi olar biýdjetti túzip, ony baqylaidy. Osy rette búgingi tańda partiialardyń máslihattarǵa kele bastaýynyń mańyzy óte zor. Olardyń partiiaishilik básekelestigin artýyna jol ashady. Iaǵni árbir depýtattyń artynda budan bylai bútindei bir partiianyń resýrsy turady. Bir óńirde bir partiianyń bir ókili bar bolsa da, ol mediialyq, saiasi resýrstarǵa ie bola alady», - dedi ol.
Talǵat Qaliev búgin máslihatqa engen partiialar erteń Májiliske enýge mol múmkindik alatynyn jetkizdi.
«Bizde 1 paiyz alyp qalǵan birde-bir partiia joq. Kúni keshe ǵana paida bolǵan «Adal» partiiasynyń ózi 3 paiyzdan astam daýys aldy. Bul – eki ailyq nasihat jumysynyń úlken nátijesi. Bul degenimiz sailaýǵa nazardyń joǵary bolǵanyn, nasihat jumystary da tiimdi ári sapaly júrgizilgenin kórsetedi. Bir ókinishtisi, agrarly el bola tura Májiliste «Aýyl» partiiasynyń ókili bolmaityn boldy. Biraq menińshe, «Aýyl» partiiasynda mamandandyrylǵan sapaly baǵdarlama bolmaǵan sekildi. Sebebi «Aýyl» óz sońynan iadrolyq elektoratyn ertip kete almady. Olar osy qatelik boiynsha jumys júrgizer dep oilaimyn», - dedi ol.
