Sottalýshy «Astana EKSPO-2017» UK burynǵy basshysy Talǵat Ermegiiaev jazasyn óteý rejimin buzǵany úshin 5 kún tártiptik izoliatorǵa ornalastyryldy, dep habarlaidy "Ult aqparat" QR IIM Qylmystyq-atqarý júiesi komitetiniń baspasóz qyzmetine silteme jasap.
«Sottalýshy Ermegiiaev T. túrmede ustaý tártibin óreskel buzdy dep tanyldy jáne osy úshin bes kún tártiptik izoliatorǵa ornalatyryldy», - dep habarlady QR IIM QAJ Komitetiniń baspasóz qyzmeti.
Mekeme buǵan deiin Talǵat Ermegiiaevtiń jeńildetilgen jaǵdaida jazasyn ótegenin habarlaǵan bolatyn.
«QR Qylmystyq-atqarý kodeksiniń 138-baby boiynsha maksimaldy qaýipsizdik mekemesinde jeńildetilgen jaǵdaida sottalýshynyń ai saiyn 10 AEK kóleminde azyq-túlik ónimderi men qajetti zattardy tutynýǵa, jylyna alty sálemdeme nemese alty banderol alýǵa, jylyna 4 qysqa merzimdi jáne 4 uzaq merzimdi júzdesý quqyǵy bar», - dep málimdedi komitet ókilderi.
QR IIM QAJ komitetiniń baspasóz qyzmetiniń málimetine sáikes, sottalýshy Talǵat Ermegiiaev osy qylmystyq isti tergeý aiasynda qazirgi tańda Astanadaǵy tergeý izoliatorynda otyr.
Buǵan deiin IIM sottalǵan «EKSPO» ulttyq kompaniiasynyń eks-basshysy Talǵat Ermegiiaevke jazasyn óteý kezinde jaqsy jaǵdai jasap bergeni úshin ETs-166/10 túzeý mekemesiniń basshysy Áben N.S. jáne onyń orybasary Musaev T.O ustalyp, sot sanktsiiasymen qamaýǵa alynǵanyn habarlaǵan bolatyn.
Sonymen birge Sybailas jemqorlyqqa qarsy is-qimyl ulttyq biýrosy mekeme qyzmetkerleriniń sottalýshy Ermegiiaevke esh kedergisiz alkogoldi ishimdikter ishýge, uialy telefon men internetti erkin qoldanýǵa ruqsat berip, shekteýsiz kezdesýdi zańsyz uiymdastyryp otyrǵanyn atap ótti.
Aita ketsek, kúzetpen ustaýdyń belgilengen tártibin qaskóilikpen buzǵan adamdy ustaýǵa arnalǵan kamera tártiptik izoliator dep atalady.
