Talǵat Erǵaliev «Aq jol» partiiasynyń biraýyzdan usynylǵan kandidaty Daniia Espaevaǵa qoldaý bildirip, óziniń prezidenttik sailaýǵa qatysý týraly ótinishin qaitaryp aldy, dep habarlaidy "Ult aqparat" partiianyń baspasóz qyzmetine silteme jasap.
«Aq jol» demokratiialyq partiiasynyń tóraǵasy Azat Perýashev Qazaqstannyń Qurylysshylar odaǵynyń atynan prezidenttikke kandidat retinde ózin usyný týraly ótinish berý málimdemesine bailanysty partiianyń múshesi Talǵat Erǵalievpen kezdesti.
«Belgili bolǵandai, jýyrda ǵana ótken partiianyń sezinde alty úmitker boiynsha qupiia sailaý ótken bolatyn. Onda Qurylysshylar odaǵynyń jetekshisi 31,6% daýysqa ie bolyp, ekinshi oryn alǵan. Azat Perýashev óz kandidatýrasyn usynǵan kez-kelgen azamatqa sekildi Talǵat Erǵalievtiń quqyǵyna da qurmetpen qaraitynyn aitty. Onyń ústine, mundai qadam jasaýyna túrtki bolǵany onyń partiialyq daýys berý kezinde joǵary nátijege qol jetkizgeni ekeni onsyz da túsinikti. Alaida, ol «praimerizdiń» alty qatysýshylaryna partiianyń biraýyzdan sailanǵan úmitkeri Daniia Espaevanyń komandasyna qosylý týraly quryltaidyń sheshimi jóninde eske salyp ótti» delingen habarlamada.
Óz kezeginde, T. Erǵaliev sezdiń sailaý qorytyndysyna qatysty eshbir mini joq ekenin jetkizgen.
«Ol QR Qurylysshylar odaǵynyń atynan úmitkerlikke ózin usynýyn durys dep sanaidy. Óitkeni, bul uiymdy burynnan basqaryp kele jatqandyqtan, atalmysh saladaǵy ótkir máselelerdi jáne turǵyndardyń qoljetimdi baspanaǵa degen muqtajdyǵyn egjei-tegjeili biledi. Bul túitkildi máselelerge memlekettik deńgeide tiisti nazar aýdarylyp jatqan joq dep paiymdaidy» deidi baspasóz ókilderi.
Sondai-aq, ol bir ǵana partiianyń atynan birden úsh partiia múshesiniń ár túrli qoǵamdyq birlestikterdiń atynan sailaýǵa kandidattyqqa usynylǵany jóninde mysaldar keltirip ótken.
«Soǵan qaramastan, «Aq jol» partiiasyna degen óziniń syi-qurmetin bildirip, partiia tóraǵasymen áńgimeleskennen keiin Talǵat Erǵaliev Ortalyq sailaý komissiiasynan óziniń ótinishin qaitaryp alýǵa nietti ekenin jáne Daniia Espaevanyń sailaýaldy naýqanyna qatysýǵa ázir ekenin málimdedi. Azat Perýashev QR Qurylysshylar odaǵynyń tóraǵasyna tilektestigi men er-azamatqa tán áreketi úshin óz alǵysyn bildirdi» delingen partiia málimdemesinde.
Aita ketsek, jaqynda Qazaqstannyń qurylysshylar odaǵy Prezident sailaýyna úmitker retinde Talǵat Erǵalievti usynǵan bolatyn.
