Foto: ashyq derekkóz
Talǵat Baisýfinov Qazaqstannyń ulttyq fýtbol quramasynyń bas bapkeri qyzmetine taǵaiyndaldy. Bul jóninde Qazaqstan fýtbol federatsiiasynyń baspasóz qyzmeti resmi túrde habarlady.
Federatsiia taratqan aqparatta Talǵat Baisýfinovtyń ulttyq quramanyń bas bapkeri laýazymyna kelgeni aitylǵan.
Aita keteiik, 2025 jyly Baisýfinov Qazaqstan quramasyn ýaqytsha basqarǵan bolatyn. Osy kezeńde ulttyq komanda 2026 jylǵy álem chempionatyna irikteý aiasynda birqatar oiyn ótkizdi. Qazaqstan quramasy Lihtenshteindi 4:0 esebimen jeńip, Soltústik Makedoniia jáne Belgiia komandalarymen 1:1 esebimen teń oiyn kórsetti.
Talǵat Baisýfinov buǵan deiin de ulttyq quramanyń bas bapkeri qyzmetin atqarǵan. Ol bul mindetti 2016–2017 jáne 2020–2022 jyldary oryndady.
Mamannyń klýbtyq deńgeide de tájiribesi mol. Ár jyldary «Esil-Boǵatyr» (Petropavl), «Aqsý», «Ertis» (Pavlodar), «Aqjaiyq» (Oral) komandalaryn basqardy. Sonymen qatar Qazaqstannyń jastar quramasymen jumys istegen.
Fýtbolshy retinde Talǵat Baisýfinov «Ertis», «Metallýrg», «Eńbek», «Ekibastuzets», «Jetisý» jáne «Vostok» klýbtarynda óner kórsetti.
