instagram/advokat_saryyeva
Talǵardaǵy keshe urlanǵan kishkentai qyzǵa dárigerler sátti ota jasap, tiline segiz tigis saldy. Bul týraly advokat Gaýhar Sárieva áleýmettik jelidegi paraqshasynda aitty, - dep habarlaidy Ult.kz.
Sárieva oqiǵaǵa qatysty jańa málimetterdi de bólisti. Onyń aitýynsha, qylmysker qyzdy kóligine otyrǵyzyp, jardan qulap ketken kezde bala jaraqat alyp, denesinde jaralar paida bolǵan.
"Ol (qylmysker – esk.) oǵan qol tigizbegen. Qyz aman qaldy. Ol qylmysker áieldi de, balany da alyp ketý úshin kelgen bolýy múmkin. Eger ol olardy úide kórgende ne bolaryn elestete almaimyn", – dedi Sárieva.
Advokattyń málimetinshe, qyzy urlanǵan jábirlenýshi áiel – medbike. Qyz urlanǵan, al aǵasy óltirilgen sátte ol kórshisiniń úiinde qaterli isikke shaldyqqan naýqasqa dári qoiyp jatqan.
Eske salaiyq, 6 qyrkúiekte Talǵar mańyndaǵy Qyzylqairat aýylynda dúr silkindirgen qylmys boldy. Er adam aýyl turǵynyn atyp óltirip, onyń kishkentai jienin urlap ketken. Keiinirek arnaiy jasaq balany qutqaryp, anasymen qaýyshtyrdy. Kúdikti ustaldy.
Sárieva oqiǵaǵa qatysty birneshe video jariialap, keibir derekterdi naqtylady.
