Almaty oblysy Talǵar aýdany ákiminiń ustalǵany rastaldy. Bul týraly jemqorlyqpen kúres is-qimyl agenttiginiń redaktsiiaǵa jibergen jaýabyna súiengen zakon.kz saity habarlady.
"Almaty oblysy boiynsha jemqorlyqpen kúres is-qimyl qyzmeti Talǵar aýdany ákimdiginiń laýazymdy tulǵalaryna qatysty para alý faktisi boiynsha sotqa deiingi tergeý amaldaryn júrgizip jatqanyn habarlaimyz. Talǵar aýdanynyń ákimin qamaýǵa alýǵa tergeý soty sanktsiia bergen. Sotqa deiingi tergeý amaldaryna qatysty ózge derekter Qylmystyq-protsessýaldyq kodekstiń 201-babyna sáikes jariialanbaidy" delingen agenttik jaýabynda.
Sońǵy ret Talǵar aýdanynyń ákimi bolyp Serikjan Erekeshev taǵaiyndalǵan. Ol jáne ainalasyndaǵy taǵy eki sheneýniktiń ustalǵany jóninde habar osyǵan deiin de taraǵan. Biraq resmi oryndar aqparatty rastamaǵan bolatyn.
Almaty oblysynyń ákimdigi Tengrinews agenttigine Erekeshevti qyzmetinen bosatý týraly buiryq shyqpaǵanyn aitqan. Talǵar aýdanynyń resmi saitynda Erekeshev aýdan ákimi retinde kórsetilgen. Kei aqparatqa qaraǵanda ákim men onyń orynbasary jáne bólim basshysy 10 mln teńge kóleminde para aldy degen kúdikke ilingen.
Bilik paraqorlyqpen kúresý maqsatynda kóptegen baǵdarlama usynsa da, Qazaqstan álemdik jemqorlyq indeksinde "paraqorlyq jailaǵan elderdiń" qatarynda tur. Jemqorlyqpen kúres agenttigi bilik tarmaqtarynda jumys isteitin sheneýnikterdiń jemqorlyqpen ustalǵanyn jii habarlaidy. Úkimette jumys istegen ondaǵan sheneýnik para aldy dep aiyptalyp, jazalanǵan.
