video kadry
Áleýmettik jelilerde Taldyqorǵanda burynǵy súiiktisine shabýyl jasap, tamaǵyn kesip jibergen 35 jastaǵy er adam úiine shyǵaryldy degen aqparat tarap jatyr. Aqparatqa qatysty politsiia pikir bildirdi, - dep habarlaidy Tengrinews.kz saity.
Buqaralyq aqparat quraldary málimetinshe, er adam qaitadan bosatylǵan.
Alaida oblystyq Politsiia departamenti bul aqparatty joqqa shyǵardy. Olardyń aitýynsha, kúdikti ýaqytsha ustaý izoliatorynda.
"Politsiia qyzmetkerleri 27 jastaǵy qyzǵa shabýyl jasaǵan kúdiktini anyqtap, ustady. Oǵan qatysty "kúzetpen ustaý" bultartpaý sharasy tańdaldy. Kúdikti Taldyqorǵan politsiiasynyń ýaqytsha ustaý izoliatoryna qamaldy", - dedi Jetisý oblysy PD ókilderi.
Quqyq qorǵaý organdary isti "Sýyq qarýmen jasalǵan buzaqylyq" babynan "Kisi óltirýge oqtalý" babyna qaita saralaǵannan keiin ol birden qamaýǵa alynǵan.
"Alǵashynda oqiǵadan keiin ol Qylmystyq-protsessýaldyq kodekstiń 128-baby boiynsha ýaqytsha ustaý izoliatoryna qamaldy. Eki kúnnen keiin qalalyq sot oǵan qatysty úiqamaqqa alýdy sanktsiialap, bosatyldy. Keiinirek politsiia men prokýratýra bultartpaý sharasyn ózgertý týraly ótinish berdi, sodan keiin ol qaitadan ýaqytsha ustaý izoliatoryna qamaldy", - dep túsindirdi vedomstvo.
Eske salaiyq, Taldyqorǵanda er adam burynǵy súiiktisine shabýyl jasap, tamaǵyn kesip jibergeni habarlanǵan bolatyn.
Taraǵan aqparatqa sáikes, oqiǵa 27 qazanda qaladaǵy sulýlyq salondarynyń birinde bolǵan. 28 jastaǵy qyzǵa burynǵy jigiti shabýyl jasaǵan. Oqiǵa beinebaqylaý kameralaryna túsip qalǵan. Kadrlarda er adamnyń qyzdy jerge qulatyp, tunshyqtyryp jatqanyn kórýge bolady. Osydan keiin ol ústelden qaǵazdarǵa arnalǵan pyshaqty alyp, qyzdy baýyzdaýǵa tyrysady. Pyshaqpen birneshe soqqy jasaǵannan keiin er adam ketip qalady.
