Almaty oblysynyń ákimi Amandyq Batalov bastaǵan bir top kásipkerler, investitsiialyq tartymdylyǵy zor aýdan basshylary men salalyq basqarma basshylary Ózbekstanǵa resmi saparmen bardy. Aldymen Tóle bi babamyzǵa quran baǵyshtaǵan jetisýlyqtar resmi kezdesýlerdi bastap ketti. Bul týraly Almaty oblysy ákimi baspasóz hatshysy Ǵalymurat Júkel habarlady.
Habarlamada óńir basshysy áýeli «Ýzagrotehmash» kompaniiasyna tiesili Tashkent traktor zaýytynyń jumysymen tanysqany aityldy. Ári kezdesý barysynda Amandyq Batalov tehnikany satyp alyp qana qoimai, ony Jetisýda qurastyrýdyń eki tarapqa da tiimdi bolatynyn tilge tiek etken. Ol úshin Almaty oblysynyń múmkindigi zor ekendigin alǵa tartqan oblys ákimi "Taldyqorǵan" indýstrialdy aimaǵynan jer bólýge daiyn ekenin, sol jerde jinaqtaý tsehin ashýdy quptaitynyn jetkizedi.
Óz kezeginde bul usynysty qup kórgen Ózbekstan Premer-ministriniń orynbasary Nodir Otajonov Tashkent traktorlarynyń Qazaqstan naryǵyndaǵy suranysyn zerdelep, tiimdiligin anyqtaý úshin arnaiy jumys tobyn jiberetindigin alǵa tartqan. Qazir zaýyt jylyna 6 myń aýylsharýashylyq tehnikalaryn shyǵarýda. Salystyrmaly túrde alǵanda byltyr bul kórsetkish 1,5 myń danany quraǵan.
Ǵalmurat Júkeldiń aitýynsha, budan soń Amandyq Batalov bastaǵan biznesmender Qazaqstannyń Ózbekstandaǵy elshiliginiń qoldaýymen ótkizilgen biznes forýmǵa qatysqan. Onda atalǵan aimaqtyń investitsiialyq áleýeti aitylyp, jetisýlyq zaýyt-fabrikalardyń jumystary tanystyrylyp ótken.
Aitalyq, byltyr Almaty oblysy men Ózbekstan Respýblikasy arasyndaǵy saýda-sattyq kólemi 36 million AQSh dollaryn quraidy. Sonyń nátijesinde oblys kásipkerleri 15,8 mln. dollardy quraityn taýar eksporttasa, import – 20,2 mln. dollarǵa jetedi. Osy oraida, ózara yntymaqtastyqty, saýda sattyqty arttyrýdyń ońtaily jolyn izdegen qos tarap birqatar jobalardy da talqydan ótkizedi.
Taǵy sol shetelden kelgen aqjoltai aqparatqa súiensek, Amandyq Ǵabbasuly budan soń jańadan boi kótergen Tashkenttegi Qazaqstan elshiligine baryp, elshilik aýlasyna aǵash otyrǵyzady. Osy barysta Almaty oblysy ákimi jańa ǵimaratta Jetisý óńiriniń jeke bólmesi ázirlenip, kásipkerlerdiń kelissóz júrgizýlerine múmkindik týǵanyn da atap ótedi. Ózbekstandaǵy resmi is-sapardyń alǵashqy kúni Almaty oblysynyń mádeniet kúnderiniń ashylý saltanatymen qorytyndylanyp, 900 oryndyq "Túkistan" kontserttik zalynda jetisýlyq ónerpazbardyń merekelik kontserti ótken. Shara aiasynda ózbek aǵaiyndarǵa ulttyq qol ónerimiz jaily syr shertetin kórme uiymdastyrylyp, Altyn adamnyń áshekei buiymdary kópshiliktiń nazaryna usynylyp otyr.
Qozybai QURMAN,
Almaty oblysy
