Áleýmettik jelide Taldyqorǵan qalasynda oqýshylardyń mektep dárethanasynda túsirgen videosy paida boldy. Videoda balalar túrmedegi jaǵdaidy sipattaityn oiyndy oinap, ádepsiz áreketter jasaidy, dep habarlaidy Zakon.kz.
Buǵan kýá jelidegiler muny oqýshynyń birine jasalǵan zorlyq-zombylyq dep baǵalap, ýákiletti organdardy jaǵdaidy túsindirýge shaqyrdy. Jetisý oblysynyń bilim basqarmasy bul videony Abai atyndaǵy №1 mektep-gimnaziiasynyń oqýshylary túsirgenin málimdep, bolǵan oqiǵanyń egjei-tegjeiin anyqtaýǵa ýáde berdi:
"Jaǵdai baqylaýǵa alyndy. Mán-jailardy anyqtaý úshin mektep ákimshiligimen, muǵalimdermen jáne ata-analarmen jumys júrgiziledi. Sonymen qatar, mektepke quqyq qorǵaý organdary men tiisti quzyretti mekemelerdiń mamandary tartylady, keshendi tekserý sharalary uiymdastyrylady".
Sondai-aq oqý ornynda qorqytyp-úrkitýdiń aldyn alýǵa, tártiptik baqylaýdy, sondai-aq balalar arasyndaǵy tárbie jumysyn kúsheitýge ýáde berildi.
"Politsiia jelide jariialanǵan videodaǵy barlyq mektep oqýshylaryn anyqtap, olarmen profilaktikalyq áńgime-dúken júrgizdi. Oqýshylar munyń jái oiyn ekenin aitqan. Alaida, osyndai jaǵdailardyń yqtimal saldaryn eskere otyryp, olarmen aldyn alý sharalary júrgizildi",-dep habarlaidy oblystyq politsiia departamentiniń baspasóz qyzmeti.
Quqyq qorǵaý organdary mektep oqýshylarynyń ata-analary tárbie mindetterin tiisinshe oryndamaǵany úshin ákimshilik jaýapkershilikke tartylǵanyn atap ótti.
Óńirdegi Bala quqyqtary jónindegi ýákil Ermek Eginbaev ta málimdeme jasady. Onyń aitýynsha, mundai oiyndardy oinaýǵa bolmaidy.
"Atalǵan oqiǵanyń mán-jaiyn anyqtaý maqsatynda bilim berý uiymynyń ákimshiligimen, muǵalimdermen jáne ata-analarmen jumys júrgizildi. Sonymen qatar, mektepke quqyq qorǵaý organdary men tiisti quzyrly mekemelerdiń mamandary tartylyp, tekseris uiymdastyryldy. Úsh ata-anaǵa qatysty QR ÁQBtK 127-babynyń 1-bóligimen hattamalar toltyryldy. Sonymen qatar, úsh kámeletke tolmaǵan mektepishilik esepke alyndy. Oqýshylardyń aitýy boiynsha olardyń arasynda oiyn-qaljyń bolǵan, eshqandai qysym, kúsh kórsetý bolmaǵan. Alaida bundai oiynǵa jol berýge bolmaidy. Osy maqsatta, mektepte muǵalimder men psihologtar tarapynan qandai tárbielik jumystar júrgizilip jatqanyn, mektepte býllingtiń aldyn alý sharalary, psihologiialyq qoldaý jumystary men tártiptik baqylaý júiesi qandai jaǵdaida ekenin anyqtaý maqsatynda mektepke baryp qujattaryn kórip, mektep oqýshylarymen kezdesýdi josparlap otyrmyn", - deidi ol.
