Búgin Taldyqorǵan qalasyndaǵy oblystyq perinataldy ortalyqta dúniege kelgen úshemder úiine shyqty, - dep habarlaidy "Ult aqparat".
Atalǵan perzenthanada 27 sáýir kúni ul balalardyń ekeýi 1 keli 800 gramm jáne biri 2 keli salmaqpen týǵan. Oblystyq perinataldy ortalyqtyń direktory Qanat Jumashev perzenthanadan shyǵatyn kezde sábiler 500 gramǵa deiin salmaq qosqanyn aitty.
«Balalar kesir tiligi arqyly dúniege keldi. Perzenthanada bir ai boiyna úshemder men anasynyń densaýlyǵyn qatań baqylaýǵa aldyq. Óitkeni ýaqytynan buryn dúnige kelgendikten kez-kelgen ýaqytta qiyndyq týýy múmkin. Qazir densaýlyqtary jaqsy, jaǵdailary qalypty», - dedi perzenthananyń bas dárigeri.
Balalardyń ata-anasy Imanǵabylovtar Eskeldi bi aýdanyna qarasty Aldabergenov aýyldyq okrýginiń turǵyndary. Anasy 33 jastaǵy Marjan Imanǵabylova mektepte aǵylshyn tilinen sabaq beredi. Buǵan deiin eki balany dúniege ákelgen Marjan endi kópbalaly ana atandy.
Eskeldi aýdandyq ortalyq aýrýhanasynyń bas dárigeri Roza Ibraeva úshemderge qajetti meditsinalyq kómek kórsetiletinin aitty.
«Úshemderdiń kútimine orta meditsina qyzmetkerleri kómek kórsetedi. Ýchaskelik dáriger balalardyń densaýlyǵyn baqylaýda ustaidy. Sonymen qatar úshemderdi balalarǵa arnalǵan tamaqpen qamtamasyz etetin bolamyz»,- dedi bas dáriger.
Aita keteiik, biyl jalpy Almaty oblysynyń úsh otbasynda úshem dúniege keldi.
