Taldyqorǵan qalasynda kútýshisi ólimshi etip sabaǵan úsh jasar bala aýrýhanada kóz jumdy, - dep habarlaidy Tengrinews.kz agenttigi "Habar 24" telearnasyna silteme jasap.
Telearna málimetinshe, balanyń anasy kútýshini internetten taýyp, eki balasyn kúni-túni qaldyrǵan. Bala kútiminiń aqysyn tólei almaǵan soń, bala kútýshi balalardy anasyna bermei, úiinde qamap ustaǵan.
"13 qyrkúiek kishi ulym Zahar bir jasqa toldy. Al osy qaza tapqan ulym mamyrda úshke tolǵan. Úlken qyzym internatta turyp oqidy", - deidi sábidiń anasy Madina Taýkenova.
Oqiǵanyń qalai bolǵanyn baiandai kele ol balasynyń ólimine Qarlyǵash esimdi kútýshi kináli dep málimdeme jasady.
"Kishi ulym bir jasqa tolǵanda kútýshige zvondap, onyń týǵan kúnin atap ótkim keletinin aittym. Qolhat jazyp bereiin, týǵan kúninde alyp keteiin dedim. Qarlyǵash maǵan telefon soǵyp, biraz aqsha qaryzsyń, qashan beresiń dedi. Men aqsha bolmai jatqanyn aityp, kúte tur dedim. Taǵy da sol qolhat jazyp bereiin, Devid pen Zahardy kórsetshi, saǵyndym dedim. Senbeimin, bermeimin dedi. Men qatty saǵynǵanymdy aittym", - deidi áiel.
Madina Taýkenova óziniń úii, aqshasy joq jetim ekenin aitqan. Jaǵdaiy bolmaǵan soń, internetten tapqan bala kútýshige eki ulyn qaldyryp, ózi Taldyqorǵan qalasyndaǵy qonaqúiler men ártúrli mekemelerdiń edenin jýyp, aqsha tapqan.
"12 qyrkúiek telefon soǵyp, bala qatty aýyryp, dene qyzýy kóterilip jatyr dedi. Baryp qarasam, betiniń saý jeri joq, qulaǵyna deiin kógergen, qoly tastai, balamnyń aýzy ashyq, kózi ashyq, es tússiz jatyr eken. Olar maǵan birese vannada qulady, birese talyp qulady dedi. Qarlyǵash "politsiia kelse, meni bala kútýshi dep aitpa, týysqan tátem dep ait" dedi. Balany urdyńyzdar ma dep edim, "joq" dedi. Balany ózim aýrýhanaǵa apardym, dárigerler qabyldap alyp, syrtta kútińiz dedi. Kóp ýaqyt ótpei, shamamen jarty saǵattan keiin dáriger shyǵyp, "imandy bolsyn, bala kóz jumdy" dedi. Men óz qulaǵyma ózim senbei, balamdy kórsetińizder dedim. Áli de bolsa balamnan aiyrylyp qalǵanyma sene alar emespin", - deidi ol.
Tergeý barysynda balanyń birneshe ret soqqyǵa jyǵylǵany anyqtalǵan.
"Bala kútýshini ustap, ýaqytsha ustaý izoliatoryna qamadyq. Biraq qalalyq sot oǵan qatysty úiqamaqqa alýdy sanktsiialady. Atalmysh derek Qylmystyq kodekstiń 106-babynyń 3-bóligi "Qasaqana ziian keltirý" boiynsha qylmystyq is qozǵalyp jatyr", - dedi Jetisý oblysy boiynsha PD resmi ókili.
