Taldyqorǵan qalalyq politsiia basqarmasynyń qyzmetkerleri balalardy zorlyq-zombylyqtan qorǵaý maqsatynda «Qatygezdik pen zorlyq-zombylyqsyz balalyq shaq» atty aptalyq aktsiia ótkizýde, dep habarlaidy «Ult aqparat» oblystyq politsiia departamentiniń baspasóz qyzmetine silteme jasap.
«Aktsiianyń maqsaty – balalardy qatygezdikpen jáne nemqurailyqpen qaraý problemasyna qoǵamnyń nazaryn aýdarý jáne qoǵamda balaǵa zorlyq-zombylyq jasaýǵa jol berilmeitin nanymdardy qalyptastyrý. Jalpy jasyna, damý deńgeiine, áleýmettik mártebesine qaramastan árbir adamnyń ómiri qundy», - deidi Taldyqorǵan qalalyq PB bastyǵynyń mindetin atqarýshy, politsiia polkovnigi Marat Túsipbekov.
Aktsiia sheńberinde halyqtyń nazaryn balalarǵa qatygezdik kórsetý problemasyna aýdarýǵa, olardyń aldyn alýǵa, ata-ana jaýapkershiligin arttyrýǵa, nasihattaýǵa, zorlyq-zombylyq jáne balalarǵa qatygezdik kórsetý jaǵdailarynda kómek kórsetýdiń qoljetimdiligin qamtamasyz etýge jáne tiimdiligin arttyrýǵa baǵyttalǵan is-sharalar ótkiziletin bolady. Sondai-aq, áleýmettik qaýipti jaǵdaidaǵy balalardy anyqtaý úshin reidtik is-sharalar men túrli túsindirý jumystary júrgiziledi.
Eske sala ketsek, «Qatygezdik pen zorlyq-zombylyqsyz balalyq shaq» aktsiiasy Taldyqorǵan qalasynyń aýmaǵynda 20-28 qazan aralyǵynda ótkiziledi.
«Aktsiia barysynda biz bilim berý organdarymen birlesip, jalpy bilim beretin oqý oryndarynyń ata-analar komitetterimen kámeletke tolmaǵandarǵa qatysty jasalatyn qylmystardyń aldyn alý máselelerin talqylaý jáne sharalar qabyldaý úshin jinalystar ótkizýdi josparlap otyrmyz. Sonymen qatar, kámeletke tolmaǵandarǵa qatysty jasalatyn bopsalaý faktilerin anyqtaý jáne jolyn kesý maqsatynda jalpy bilim beretin oqý oryndarynda jasyryn saýalnama júrgiziledi», - deidi Almaty oblysy PD JPQB ETJ aǵa inspektory, politsiia podpolkovnigi Medet Qunanbaev.
Sondai-aq, tártip saqshylary turǵyndar arasynda kámeletke tolmaǵandarǵa qatysty turmystyq, seksýaldyq zorlyq-zombylyq pen qatygezdiktiń aldyn alý boiynsha aqparattyq jadynamalar men býkletter taratatyn bolady.
«Kámeletke tolmaǵandardy tárbieleý jónindegi ata-ana mindetterin tiisinshe oryndamaý faktilerin anyqtaý maqsatynda IIO esebinde turǵan «qolaisyz otbasylardyń» turǵylyqty jeri boiynsha túsindirý jáne aldyn alý jumystaryn júrgizý úshin tekserý uiymdastyrylady. Kámeletke tolmaǵandar arasynda erte júktiliktiń aldyn alý úshin oblystyń joǵary synyp oqýshylary arasynda túsindirý jumystaryn júrgizý úshin densaýlyq saqtaý organdarynyń meditsina qyzmetkerleri tartylady», - dep tolyqtyrdy podpolkovnik M.Qunanbaev.
