Taldyqorǵan qalasy ákiminiń orynbasary jumystan bosatyldy. Oǵan ne sebep bolǵanyn Sybailas jemqorlyqqa qarsy qyzmettiń Almaty oblystyq departamenti túsindirip berdi.
Qazir atalmysh departamenttiń tergeý basqarmasy Taldyqorǵan qalasy kásipkerlik bóliminiń basshysyna jáne bas mamanyna qatysty isti tergep jatyr. Olar QR Qylmystyq kodeksiniń 366-baby boiynsha para aldy degen kúdikke ilingen.
Aita keteiik, atalǵan bólimniń bastyǵy qaramaǵyndaǵy bas mamanmen sybailasyp, koronavirýsqa qatysty shekteý sharalary kezinde buqaralyq is-sharalardy ótkizýge tyiym salynǵanyna qaramastan meiramhana ielerinen jáne kóshedegi saýda-sattyq núktelerinen 20 myńnan bastap 270 myń teńgege deiin para alyp otyrǵan. Olardan bólek, taǵy 5 meiramhananyń ákimshisi de para bergeni úshin qylmystyq jaýapkershilikke tartylyp otyr.
Osy qylmystyq istiń negizinde Almaty oblystyq sybailas jemqorlyqqa qarsy is-qimyl departamentiniń basshylyǵy Taldyqorǵan qalasy ákiminiń qatysýymen keńes ótkizdi. Onyń nátijesi boiynsha tiisti baqylaý jasamaǵany úshin Taldyqorǵan qalasy ákiminiń orynbasary Sáýle Arzanbekova jumystan bosatyldy. «Atalǵan jemqorlyq qylmysyn tergeý jalǵasyp jatyr. Basqa málimetter tergeý múddesine bailanysty jariialanbaidy», - dep tolyqtyrdy departament ókilderi.
