Kieli Aqjaiyq óńirinde turatyn ádebiettanýshy ustaz, poeziia áleminde ózindik qoltańbasyn qalyptastyryp úlgergen aqyn Talap Taimasulynyń "Alshy" jinaǵy - búgingi qazaq balalar ádebietiniń úlken oljasy. Mine, atalmysh kitaptaǵy týyndylarda ol óz ómir tájiribesin, ónegesin, aqyl-bilimin balalarǵa bazarlyq túrinde tartý etedi. Ulttyq qundylyq – tálim-tárbieni, mentaldyq tanymdy sóz óneri arqyly balalarǵa uǵyndyrǵysy keledi, jas sanaǵa áserli jetkizýge tyrysady, keleshek pen búgingi urpaq kósegesiniń kógergenin kókseidi. Endeshe, Ult portaly qalamgerdiń sońǵy kezde jazǵan móldir óleńderin jas oqyrman nazaryna usynady.
Jaz
Jadyraǵan jaz qandai, Kún monshaǵy tógilgen. Kún qushaǵyn jazǵandai, Ystyq lep bólingen. Shabaq oinap kól beti, Shaǵala júr qoryǵan. Saǵymnyń da kelbeti, Qyrdyń basyn toryǵan. Jaz shyqqanda shybyndar, Mal sýatqa aǵylar. Jýsap jylqy, qulyndar, Siyr, qoiy taǵy bar.
Sý betine úńilgen, Balyqshynyń ermegi. Qarmaǵyna ilingen – Bir balyǵy eńbegi. Jaz shattyǵy tamasha, Eńbegimen ónikti. Berekesi jarasa, Adamdar da kórikti!
Otan
Qorǵaǵan keshegi, Otanyń kieli. Babanyń mekeni, Urpaqqa syi edi!
Qaiyryp aibaty, Dushpany yǵysqan. Eńserip qairaty, Jaralǵan quryshtan!
Erlikpen saqtaǵan, Jetkeni salamat. Tarihy «Aqtaban» - Qaldyrǵan amanat.
Babańnyń, atańnyń, Ákeńniń turaǵy! Óziń de atandyń – Otannyń ulany!
Qazaqtyń dalasy – Ultyńnyń kiesi! Joǵalmas baǵasy – Ózderiń iesi!
Taqym
Jylqyny erekshe ardaqtar, Qazaqtyń saltynda salmaq bar. Atanyń ǵurpy men dástúrin, Ul bolsań, ulyqtap jalǵap qal! Jigit bol tulpardy taqymdar, Azamat atanar atyń bar. Tizginder asaýdy alqynǵan, Qazaqy qanyńda zatyń bar! Al, káne, asaýdy tańdap al, Quryqta, qulaqta, jaldan al!Qarǵyp min, taqymdy qysyp qal, Is bolsyn qaraǵan tańdanar. Bir keri, bir tory, bir qula, Túrlishe keledi turqy da! Taqymy myqtylar tek qana, Kóndirer asaýdy yrqyna. Tizginnen airylma, aqyryn, Jetse eger qairatyń, batylyń... Saýyrdan syrǵymai tózikken, Tirlikten taimasyn taqymyń!
Aýyl
Jýsannyń iisi ańqyǵan, Saǵynyp turasyń aýyldy. Yntymaq Qaimaǵyn qalqyǵan, Ańsap-aq turasyń qaýymdy. Tólimen toltyryp qyratyn, Oinaǵan tóskeide saǵymy. Malshylar sabalap qur atyn, Óristen shubyrar tabyny. Qus únin tyńdaǵan kólmegi, Jatady ainadai jarqyrap. Balyǵyn shorshyǵan kóldegi, Shaǵala toridy sán qurap. Aýyldas úi-úidi jaǵalap, Saýlyǵyn surasyp dám tatqan. Aǵaiyn týmasyn aralap, Aýyldyń arasyn shańdatqan. Aýyldyń ǵajaiyp tańy da, Qorazdyń únimen atatyn. Túni de erekshe taǵy da, Sybyry estilip jatatyn!
Dombyra
Babanyń kúii bar, qos ishek úninde. Sazyna syiynar, ótken de, búgin de. Qazaqtyń sazy bar, shanaqta saqtalǵan. Tarihtyń daǵy bar, kúiinde aqtarǵan. Ultyńnyń tili bar, pernede til qatqan. Babańnyń bilip al, murasyn tyńdatqan!
Dombyra – qazaq bul, al qazaq – dombyra! Kiesi ǵajap bul – Qazyna, mol mura! Qasterlep, uǵynar, dombyra kúmbirin. Balaqai, uǵyp al – Qazaqy ún qunyn!
Úlkenge qurmet
Qariia da bala bop, Toimaǵan esh qyzyqqa. Bar kóńili dala bop, Bolǵan bolar buzyq ta! Biraq kezi balalyq, Qiyndyqpen shyrmalǵan. Aýyr jumys dalalyq, Balǵyn júzin kún qarǵan. Erteli-kesh eńbekpen, Bilekteri shynyqan. Sol eńbekpen er jetken, Qariia ol tynyqqan.
Qart ǵumyryn ardaqta, Ótkeninen túńilgen! Kóngen olar salmaqqa, Úmit kútip búginnen! Qariiany aiala, Shejiresi ultyńnyń! Kómegińdi aiama, Qazynasy bul kúnniń!
Qulynshaq
Qulynshaǵym, qulynym, Tórt túliktiń tóresi. Altyn aidar jurynym, Tulpar bolar óresi. Aýyzdyqpen alysqan, Qazanattyń kiesi! Dáýirmenen tabysqan, Tektiliktiń iesi! Sáigúlikter tuiaǵy, Dúbirletken dalany! Qarǵyp óter qiiany, Aryndaǵan qadamy!
Kúmis tústi túgine, Kúnniń nury jarasqan. Kúmbir - kúmbir únine, Dala sazy talasqan! Qambar Ata balasy, Ǵasyr júgin arytqan. Túr turpatyn qarashy – Babam dańqyn tanytqan!
Ustaz
Ómir – maidan, aq-qarasy alysqan, Álsizderdi ámirimen janyshqan! Uly sezim sol maidannyń batyly – Ustazdardyń jigerimen tabysqan! Ustaz osy – Eńbek, maqsat birligi, Shákirtimen eselener bir kúni. Ustaz osy – shýaǵymen sýǵarǵan, Bilim nári, tógiletin kún nury!
Ustaz osy – Sábi júrek, bala tym, Bekitetin keleshektiń qanatyn. Ustaz osy – ár jyl saiyn jasaryp, Júreginde shákirtiniń qalatyn! Ustaz osy – Jas armannyń jelkeni, Baǵyt alar úmit toly erteńi.Óris alar bilim qutyn jutqandar, Eldiginiń týyn shyqpas órkeni! Ustaz osy – Qajyr, qairat, «Jas jalyn», Báske tikken eńbek úshin bastaryn! Ustaz osy – Tózimdilik jalaýy, Jeńisimen kórkemdeitin aspanyn!
Ulyq emes, Uly joldy tapqandar – Bolashaqqa arai tókken aq tańdar! Tuǵyr bekem, sarqylmasyn bilim nár, Sanasyna jiger otyn jaqqandar!
Ájesiniń kózi
Oiyn qyzdy jarysyp, Arasynda alysyp. Kelis bolmai kei kezde, Qaldy olar qaǵysyp. Alysty da julysty, Tastai saldy bul isti, Qaita endi kelisip, Bir-birimen uǵysty. Jyrtyp biri kimesin, Biri úzip túimesin. Bar oiyndy túgesip, Qaitty olar úige keshin.
Kórip áje kiimdi, Qabaq shytyp kúiindi. Bergenińe shúkir dep – Sodan keiin syiyndy. «Tentegim» dep, súigesin, Qadaý úshin túimesin. Qolǵa aldy ájesi, Jibi menen inesin. Shiyrshyqtap sabaǵyn, Jasaýratyp janaryn. Nemeresin shaqyrdy: Sabaqta – dep, qaraǵym! Ájesiniń maqtany – Nemeresi aqtady. «Ájesiniń kózi» - dep, Ájesi ony maqtady!
