Talantty jastarymyzdyń jolyn ashýymyz kerek. Bul týraly búgin «Táýelsizdik urpaqtary» Jastar jylynyń ashylýynda Elbasy Nursultan Nazarbaev aitty, dep habarlaidy QazAqparat tilshisi.
«Búgingi álemge áigili iri kompaniialardyń negizin jas kásipkerler qalaǵanyn barlyǵyńyz bilesizder. Mysaly Feisbýkti Mark Tsýkerberg 19 jasynda oilap tapty. Maikrasofty Beil Geits 20 jasynda, Aplle kompaniiasyn Stiv Djobs 21 jasynda qurdy. Bizde de 13 jasynda QBTÝ-dyń 2 kýrsyn oqyp jatqan balany qazir ǵana tyńdadyq. Olardyń barlyǵy aspannan salbyrap túsken joq. Talant degen de bar, ony jasyrýǵa bolmaidy. Biraq Einshtein aitqandai, talantyń 90 paiyzy eńbek», - dedi shara barysynda Elbasy.
Memleket basshysy EKSPO nysandarynyń biri startap-jobalardy ázirleýmen ainalysatyn jastarǵa berilgenin atap ótti.
«Sol jerde Qazaqstannyń 200 jasy óz sharýalaryn jasap jatyr. Men baiaǵyda arnaiy bir úlken ǵimarat salyp, birdeme jasap, ony ary qarai damytamyn degen balalardyń barlyǵyna múmkinshilik jasaý kerek dep oilaýshy edim. Olardyń oilap tapqan jobalaryn kommertsializatsiialaýǵa kómektesý kerek. Halqymyzda «aqyl jastan, asyl tastan» degen naqyl sóz bar. Bizdiń jastarymyzda mundai qasiet bar ekenin kórip otyrmyz. Myna zalǵa barlyq talanttarymyzdy jinai almaimyz, simaimyz. Biraq barlyq jastarymyzǵa jol ashý mańyzdy», - dedi QR Prezidenti.
Aita keteiik, Astanada «Táýelsizdiktiń urpaqtary» ataýymen Jastar jylynyń ashylý saltanaty ótip jatyr.
Sharaǵa Úkimet músheleri, QR Parlamenti depýtattary, jergilikti atqarýshy organ basshylary, QR Prezidenti janyndaǵy Jastar saiasaty keńesiniń músheleri, «100 jańa esim» baiqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jiynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýi media salasynyń ókilderi, balalar úiiniń tárbielenýshileri men túlekteri, jas áskeri qyzmetshiler keldi.
Eske sala ketsek, QR Prezidenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jariialaýdy usynǵan bolatyn.
Prezident óz sózinde jastardyń barlyq sanatyn qoldaýǵa arnalǵan sharalardy tolyq qamtityn áleýmettik satynyń aýqymdy platformasyn qalyptastyrý kerektigin aitqan bolatyn Al, arada bir aidan astam ýaqyt ótkende Elbasy Jarlyǵymen 2019 jyl Jastar jyly dep jariialandy.
.jpeg)