Almatyda dárigerler tal túbinen tabylǵan 4 jasar balanyń densaýlyǵy týraly aitty, dep habarlaidy QazAqparat tilshisi.
Balalarǵa shuǵyl meditsinalyq kómek kórsetý ortalyǵy bas dárigeriniń mindetin atqarýshy Dinmuhammed Rýzýddinovtyń aitýynsha, balanyń jaǵdaiy birqalypty aýyr dep baǵalanǵanmen, klinikalyq turǵydan birqatar jaqsarý baiqalady.
«Balanyń qazirgi jaǵdaiy áli de aýyr. Biraq bala esin jiǵan. Anasynyń aitýynsha, tamaq, sý iship jatyr. Oń qolynda bulshyqettiń álsireýi - gemiparez bar edi. Qazir sál qimyldai bastady. Bir zat berseń, kóteredi. Qazir tek sóileý jaǵy sál qiyndaý bolyp jatyr. Kúnine 1-2 sóz ǵana aityp jatyr. Búginde balaǵa kepildendirilgen meditsinalyq kómek kólemi aiasynda tegin em-dom jasalyp jatyr», - dedi D.Rýzýddinov.
Munyń aldynda dárigerler jarty jyl shamasynda balaǵa qaita ota jasalyp, samai súiegi qalpyna keltiriletinin aitqan bolatyn. Ázirge onyń miy terimen qaptalǵan.
«Bala em alǵan soń 2 apta ne 1 aidai ýaqytta demalyp, qaita aýrýhanaǵa jatqyzylady, sóitip reabilitatsiialyq em-dom alady. Qazir balanyń bas súieginiń orny ashyq, tek terimen jabylyp tur. 3-6 ai aralyǵynda súiek qaita ornyna salynyp, jabylýy kerek. Sonymen balanyń jaǵdaiy jaqsarýy tiis», - dedi Almatydaǵy balalar shuǵyl meditsinalyq kómek kórsetý ortalyǵynyń bas dárigeri Abai Qusaiynov.
Aita ketý kerek, qaiǵyly oqiǵa 16 shilde kúni Odesskaia men Brianskaia kóshesinde bolatyn. Turǵyndar tal túbinen es-tússiz jatqan 4 jasar balany taýyp alǵan. Bala shalajansar kúiinde shuǵyl aýrýhanaǵa jetkizilip, ota jasaldy. Búldirshin aýyr jaraqattan 2 aptadai komada jatty.
Almaty politsiiasy atalǵan derekke bailanysty kúdikti retinde ákesin ustady. Balanyń ákesi Murat Asqarogly óziniń kinásin moiyndap, qazaqstandyqtardan keshirim surady. Er adam mastyqtan eseńgirep turǵanda balasynyń qyńqylyn kótere almai samaiynan taspen urǵan.
