Foto: gov.kz
Memlekettik kirister komiteti internet-platformalarmen birlesip, taksi júrgizýshileri men kýrerlerge yńǵaily fýnktsiialardy júzege asyryp jatyr, - dep habarlaidy "Ult aqparat" vedomstvonyń baspasóz qyzmetine silteme jasap.
MKK málimetinshe, taksi nemese kýrerlik jetkizý qyzmetterin kórsetý kezinde jeke kásipker retinde tirkelý nemese mekemege (basqa kásipkerge) jaldamaly qyzmetker retinde rásimdeý jolymen salyqtar men áleýmettik tólemderdi tóleýge mindetti.
"Bul talaptar qazir paida bolǵan joq, burynnan bar, biraq ártúrli sebepterge bailanysty kóp azamattar oryndamaidy. Bizdiń oiymyzsha, sebepterdiń biri – mindettemelerdi oryndaýǵa bailanysty ákimshilik rásimderdi oryndaýǵa daiyn emestigi", - delingen habarlamada.
Salyq tóleýshi úshin eń tiimdisi – eSalyq Business arnaiy mobildi qosymsha negizindegi salyq rejimin qoldaný. Sebebi 1 paiyzdyq stavkamen tabys salyǵyn jáne áleýmettik tólemderdi (zeinetaqy jarnalary, áleýmettik aýdarymdar jáne meditsinalyq saqtandyrý) tóleý qajet.
"Osyǵan bailanysty, internet-platformalardy paidalana otyryp qyzmet kórsetetin tulǵalarǵa salyq mindettemelerin oryndaýǵa kómektesý úshin Memlekettik kirister komiteti eSalyq Business mobildi qosymshasyn paidalana otyryp júrgiziletin salyq rejimi negizinde pilottyq jobany iske qosyp jatyr.
Onyń sheńberinde jeke kásipker retinde tirkelý tikelei internet-platformada ótedi, internet-platforma operatory tabysyn tóleý kezinde tiesili salyqtar men áleýmettik tólemderdi ustaidy jáne tóleidi, sodan keiin málimetter avtomatty túrde MKK-ǵa beriledi.
Bul jeke tulǵa salyq organdaryna barmai-aq, salyq mindettemesin oryndaidy, al salyqtardy esepteý men tóleýdegi qatelikter joiylady", - delingen habarlamada.
Búginde aqparattyq júielerdi baptaý boiynsha "Iandeks.taksimen" jumys júrgizilip jatqany, jumystar aiaqtalǵannan keiin azamattar erikti negizde pilottyq jobaǵa qosyla alatyny aityldy. Tehnikalyq júzege asyrýdyń josparlanǵan ýaqyty – 2023 jyldyń 1 shildesi.
